Gunslingers til Dønhaug

Gunslingers tek turen attende til Uskedalen for å spela opp til påskedans.

– Det er ikkje berre Tysnesfest og andre store festivalar som får vitjing av Gunslingers. Onsdag 12. april kjem dei til Dønhaug i Uskedalen for femte gong for å stå for musikken på låvedansen i påska. På Dønhaug har dei samla full låve kvar gong dei har vore her, skriv Magne Huglen i Dønhaug gjestegard i ei pressemelding.

Gunslingers har turnert i snart 10 år rundt i Norges land for utselte hus, og dei siste åra også som headliner-band for fleire av dei største festivalane. I 2016 kom bandet med sitt femte album.

– Gunslingers er eit svært godt live-band med eit solid sceneshow, og passar perfekt til ein låvedans. Kvar gong Hardanger-bandet har vitja Dønhauglåven har dei skapt stor stemning  med høg allsongfaktor. I fjor dukka sjølvaste Lothepus, ein kjenning av bandet, opp med eit stunt på låven, noko som  blei svært så populært, opplyser Huglen.

Han legg til at dei to siste åra har alle billettane vore utselde på førehand.

– Som vanleg vert det busstransport både til ytre- og indre-luten av kommunen etter at arrangementet er slutt, fortel Magne Huglen.