Han her kjem tilbake til Festidalen

Festidalen har teke på seg nissedrakta og klinkar til med sitt fyrste artistslepp for neste års festival. Opp av sekken dreg dei tre heite artistar.

På denne tida om seksten dagar benkar det norske folk seg føre TV-skjermen for å sjå om årets utgåve av Askepott har noko nytt å by på. Men ein treng ikkje venta så lenge for å få servert jula sine tre fyrste nøtter. Festidalen har nemleg teke i bruk nøtteknekkaren og delar innhaldet sitt med publikum.

Fyrst ut er bergensrapparen Lars Vaular. Ein tidlegare kjenning for Festidalen-publikummet.

– Lars er ein draum av ein festivalartist. Og ein heilt spesiell musikar. Han jobbar alltid intenst med eiga materiale, uttrykk og sine live-produksjonar. Noko me skal få sjå tydeleg på Festidalen. Fyren er eit stilikon og eit referansepunkt for moderne norsk musikk. I tillegg er han ekstremt utviklingsorientert og uredd. Respekt, skriv bookingansvarleg Daidalos Dahle i Festidalen.

 

Fanny og Hkeem

Men Lars Vaular tek sjølvsagt ikkje turen åleine. Med seg får han Abdulhakim Hassane. Også betre kjend som Hkeem. Artisten som står bak ei av landets mest spelte låtar i 2017, nemleg superhiten «Fy Faen».

– Hkeem er eg sikker på vert ein av dei store feel-good-augneblikka dette året. Dette er lyden av Norge akkurat no. Og du skal vera bra iskald eller tungt medisinert om du ikkje klarar å kosa deg til denne godklumpen, seier Daidalos til pressemeldinga.

Sist ut er Fanny Andersen. Oslo-jenta som i november i fjor fekk sitt gjennombrot på artisthimmelen med låta «Kids».

– Fanny er gull! Moderne, funky og steintøff. Det tyt guts og talent ut øyrene hennar. Og av det vert det store ting. Berre i tida frå no og fram til ho spelar hos oss kjem mykje til å skje, seier Daidalos.