Har du lyst å vera frivillig?

Festidalen manglar vel 100 frivillige før årets festival sparkar i gang fyrste helga i august. Så sit du på gjerdet og lurer på om du skal bli med, meiner frivilligsjef Mona Enes at det berre er kasta seg rundt.

– Det har vore ganske bra med søknadar til no, men vi treng sjølvsagt fleire. Så om du er litt i tvil og lurer på om du skal vera med så synst eg at det berre er å melda seg på med det same. Fordelen med å gjera det no kontra dei siste vekene er jo at du no har større valfriheit i kva du vil jobba med, seier Mona Enes.

Og det er mykje forskjelleg som skal gjerast. For utanom bar- og matteneste på fredagen, er det ledig rom på dei aller fleste andre postane. Anten det er rigging av scene, vakthald, inngang, matlaging, bar og rydding.

– Det er berre til å gå inn på nettsidene våre og melda seg til teneste. Der kan du òg setja opp tre prioritetar i forhold til kva du har lyst å gjera. Og om du har andre ting enn dei som står der eller berre treng hjelp til noko, så kan du ta kontakt med meg eller Lene Gjuvsland Skjelnes, seier Mona som allereie er byrja å gle seg til det brakar laus.

– Sjølvsagt. Det er utruleg god stemning oppe på jordet når vi held på. Så vi gler oss til å møta mykje kjekke folk og jobba for å laga ein så god festival som mogleg, sluttar ho.