Ingebjørg Eik Band på turisthotellet

Jazzarrangement av kjente låtar står på programmet når Ingebjørg Eik tar bandet sitt med til heimebanen.

Eit år er gått sidan sist Ingebjørg Eik Band heldt konsert på turisthotellet i Rosendal. I år igjen blir det ein kveld med lyrisk, vakker, rytmisk og melodiøs musikk. Sidan sist har repertoaret utvikla seg, og ein får høyra ei rad kjente melodiar pakka inn i lekre jazz-arrangement. Det dreier seg om alt frå låtar av Dolly Parton og Simon and Garfunkel, til Amy Winehouse og Pink Floyd.

– På repertoarlista står det òg filmmusikk frå filmar som Bagdad Café og faktisk Dirty Dancing. Men kanskje låtar musikken ikkje heilt slik ein er vant med. Ingebjørg Eik er frå Rosendal, har musikkutdanna seg i Oslo og har jobba som frilansmusikar i mange år. Blant anna spelt med Big Bang, Eva & the Heartmaker, m.m. Etter nokre år ute i verda har Ingebjørg bestemt seg for å flytta inn i seglbåt og attende til Rosendal, skriv bandet i ei pressemelding.

 

Kvasse musikarar

Med seg i bandet har Ingebjørg eit knippe særdeles oppegåande musikarar. Bjarne Øymyr på piano har lang fartstid i det bergenske jazzmiljøet, og spelar mellom anna i Gymnos, Kari Malmanger Band, Fredrik Saroea Quintet m.m.

Alex Grieg på kontrabass spelar med dei fleste musikarar i Bergen - både innan jazz og andre genre. Han har vore med på ei rekke plateinnspelingar og turnear i både inn- og utland.

Jakob Monsen Hjelmeland på trommer spelar mellom anna med storleikar som Miss Tati, HP Gundersen, Good Time Charlie og mange fleire.