Julekonsertar med Cantus Firmus
Koret Cantus Firmus inviterer til julekonsertar i Åkra og Ænes.
Cantus Firmus er eit kor med utspring i og rundt Kvinnherad kyrkje, under leiing av Rebekka Attramadal. Koret byrja med fire songarar i 2015, og har no vakse til å telja 11.
Artikkelen held fram under annonsen.
– Cantus Firmus er eit latinsk uttrykk, og betyr fast melodi, eller pre-eksisterande melodi. Koret ynskjer å halda høg kvalitet, og har øvt på julerepertoaret sidan før sommaren for å leva opp til denne lyden og klangen som kornamnet lovar, skriv Rebekka Attramadal i ei pressemelding.
Fredag 13. desember reiser koret til julekonsert i Åkra, medan dei søndag 15. desember kjem til Ænes.
– Me gler oss over invitasjonar frå sokneråda i Åkra og Ænes. På Ænes vert også pianist Yuko Suto med som akkompagnement. Repertoaret vert ein god blanding av ny og tradisjonell musikk. Det vert utdrag frå kjente verk som Handels Messias, Mozart, Duruflê og Andrew Lloyd Weber. Det vert også norske folketonar, amerikanskinspirerte carols og julesalmar, lovar dirigenten og garanterer samstundes julestemning for dei som kjem.