Knallveke på Baroniet

Baroniet Rosendal slår dei neste dagane til med eit kulturprogram ein ikkje finn maken til nokon stad i Norge. Thea Hjelmeland, Maria Mena og Sondre Lerche er berre nokre av høgdepunkta. Og det er enno mogleg å få tak i billettar.

Festen byrjar i kveld med den svært kritikarroste artisten Thea Hjelmeland frå Førde. Ho og bandet vil by på ei rik og variert blanding av stemningar og folk-pop i Borggården. Hjelmeland har både vunne Spellemannprisen og

Vossajazz-prisen, i tillegg til å ha fått terningkast 6 i Aftenposten for plata «Solar Plexus».

Fredag kveld vert det to arrangement i Den røde sal. Fyrst er det Kjell Arild Pollestad som skal halda føredraget «Fra sagaens verden». Etterpå vert det konsert med Sonoko Miriam Welde, fiolin og Alison Rhind, klaver. Dei skal mellom anna framføra Edward Elgar sin sonate for fiolin og klaver.

Laurdag står dei minste i fokus då dokketeateret Kaspar kjem for å halda to framsyningar. På programmet står det spennande stykket «Det spøker på Rosendal» og «Kaspar på nye eventyr».

Samlivsbrot

På tysdag kjem Sondre Lerche attende til Baroniet. Artisten frå Bergen skal halda éin konsert i Borggården.

Onsdag 13. juli vert det to konsertar med ingen ringare enn Maria Mena, artisten som turnerer Europa rundt for å opptre i store salar.

– Heile Norges Maria Mena trer endeleg frem frå stillheita med sitt sjuande studioalbum «Growing Pains». I kjølvatnet av Mena sitt samlivsbrot var det vanskeleg for ho å setja i gang ein skriveprosess – i alle fall i vaken tilstand. Det skjedde noko ganske forbløffande, nemleg det at underbevisstheita hennar slo inn, og Mena mana

fram halve albumet i søvne, vert det opplyst i ei pressemelding.

Vi tek med at neste torsdag inviterer Thomas Dybdahl til to konsertar i Borggården.