Kvelertak kjem tilbake til Festidalen

Etter å ha spelt konsert med Foo Fighters i Bergen torsdag 27. juni, toppar Kvelertak si veke med å avslutta fredagen på Festidalen dagen etter.

– Fredagen er no fullstappa. Kvelartak avsluttar kvelden etter Hit for Hit, Gåte, Miss Tati og Iris, skriv bookingansvarleg Daidalos Dahle i ei pressemelding.

 

ISÁK på laurdag

I den same pressemeldinga kan mannen som er ansvarleg for å fylla Festidalen-plakaten med artistar røpa at den ferske Stjernekampvinnaren Ella Marie og bandet hennar, ISÁK, også tek turen til Uskedalen. Dei skal saman med Kriminell Kunst, Highasakite og Moyka fylla Dønhaug med musikalske tonar laurdag.

– Og her kjem det altså to namn til i neste veke. Så det er berre å følgja med, står det å lesa i pressemeldinga før Daidalos sleng ut:

– I ei tid der maktas idioti reiser massive murar for å skilja oss, ynskjer Festidalen å samla oss kring riving av murar. Sjangermurar, sjølvsagt. Kvelertak og ISÁK er verkeleg to umake søsken i musikken. Men begge har sekken full av urkraft, språkidentitet og nasjonalhistorie når dei elegant stig over steingard etter steingard. Aldri før har me hatt fleire artistar med guts og dyktigheit til å miksa sjangrar saman, seier Daidalos.

Det betyr at det er tid for både rock og joik på Festidalen 2019.

– Med Kvelertak og ISÁK har me stolte norske artistar som ikkje gøymer røtene sine. Ikkje spring frå språket sitt og slekta si. Tvert i mot, dei løftar det fram som berande element. Det same kan seiast om Gåte. Dette vil me ha meir av, sluttar han.