Lokale krefter på Faurè sitt Requiem
Koret Cantus Firmus inviterer til to konsertar med Gabriel Faurè sitt «Requiem» i Kvinnherad kyrkje.
Opphavleg skulle det vera ein konsert fredag kveld, men grunna stor etterspurnad har koret dobla opp med ein konsert til. Tema for konserten er rekviem, og i den kyrkjelege tradisjonen er det ei dødsmesse, der alvoret, sorga og håpet er tema.
Artikkelen held fram under annonsen.
Gabriel Faurè sitt «Requiem» som skal framførast har høg alder. Det vart komponert mellom 1887 og 1890, men er framleis eit av dei mest framførte verka i kyrkjer over heile verda. Særleg rundt helga med Allehelgensdag er det ofte nytta.
Solist på konserten er Jeanne Marie La France.
– Ho er solist på ein sats av «Requiem», og me ser svært fram til å synga med ho, melder Solfrid Hellesøy Siqveland på vegne av Cantus Firmus.
La France flytta frå USA til Norge i 2007. I heimlande studerte ho song på Towson University (bachelor) og Westminister Choir College (master) i Princeton, New Jersey. I tillegg til solistoppdrag i Kvinnherad og Etne, har ho vore medlem av Kammerskoret og Husnes blandakor, og syng no med kvinnekoret Stord con Spirito.
– Gabriel Faure sitt requiem er komponert for orkester og kor. Me hadde plan om å nytta orgelet, men dette er dessverre litt for ustemt til å kunne brukast i eit korverk. Kantor Eva Megyesi vil difor akkopagnere på piano, saman med fiolinistane Karie Eide og Alida Nesheim, sluttar Siqveland.