Musikk frå første verdskrig i kammermusikkfestivalen

«I skuggen av ein krig» har Leif Ove Andsnes kalla programmet for årets Rosendal Kammermusikkfestival.

I år er det 100 år sidan første verdskrigen tok slutt.

– Det vart skrive mykje spennande musikk i krigsåra, og det er det me skal utforska under festivalen. Det er eit anna konsept enn før. Tidlegare har det vore ein komponist som har vore i sentrum, no blir det nesten motsett, seier Leif Ove Andsnes til Grenda.

Kunsten held fram

Festivalsjefen har dukka ned i musikken som vart skriven i åra 1914 til 1918, og funne eit vell å ta av.

– Me skal på alle måtar feira mangfaldet. Noko av musikken reflekterer det som skjedde rundt dei, med krig og sorg, men like mykje vart skrive trass i det som hendte rundt komponistane. Det viser at kunsten held fram, trass i vonde omstende, påpeikar Andsnes.

Festivalsjefen sjølv meiner det er interessant å gjera publikum bevisste på krigen.

– Det var ein heilt omveltande sak for verda. I mange europeiske land er det denne som blir omtala som den store krigen. Kva krigen gjorde med musikken kjem også til å bli debattert i føredrag, men mellom anna tok amerikanske soldatar med seg jazz til Europa, utdjupar stjernepianisten.

Åra som no vert utforska, fell saman med slutten på den romantiske perioden og starten på modernismen.

– Det er veldig spennande å setja saman eit program når ein har eit slikt spenn. Det er både lærerikt og interessant, seier mannen med det kunstnariske ansvaret.

Konsertrekord

I alt skal det gjennomførast 11 konsertar i løpet av dei fire dagane festivalen varer, frå 9. til 12. august. To i Kvinnherad kyrkje, to i Den raude sal og dei resterande sju i Riddersalen. Og sjølv om den tematiske ramma er 1914 til 1918, tillét Andsnes to artistar å avvika frå tema. Matthias Goerne, stjernebarytonen som opna den aller første kammermusikkfestivalen, skal syngja Schubert si «Winterreise».

– Det passar inn i tematikken, for stykket handlar om einsemd og isolasjon. Det blir ein spesiell konsert i kyrkja, lovar Andsnes.

Også sopranen Anna Prohaska får avvika frå årstala. Ho har eit program kalla «Behind the lines», som ho har turnert med og også gitt ut som album.

– Det passar inn, det også. Ho har samla songar om krig frå ei rad komponistar, og står støtt i ein heilskap, seier festivalsjefen.

Festivalen kjem også til å by på eit knippe baronivener, som Ingrid Andsnes (piano) og Henning Kraggerud (fiolin). I tillegg kjem 15 år gamle Jonas Dalen, halvt om halvt norsk og svensk og eit talent utan like.

– Han er ein «alle» snakkar om. Det blir gøy å få visa han fram, kommenterer Andsnes.

Festivalen opnar torsdag 9. august med konsert i Riddersalen. Fredagen og laurdagen blir det fire konsertar kvar dag, før det heile blir avslutta med to konsertar på sundagen.

– Det blir stritt for dei ivrigaste som skal ha alt med seg, vedgår Andsnes lattermildt.

Billettsalet opnar 19. januar.

Blant musikarane som kjem til festivalen er Matthias Goerne (bariton), Anna Prohaska (sopran), Kirill Gerstein, Bertrand Chamayou, Eric Schneider, Ingrid Andsnes (klaver), Henning Kraggerud, Akiko Suwanai, Johan Dalene (fiolin), Lars Anders Tomter (bratsj), Edgar Moreau (cello), Dover String Quartet, Andreas Ottensammer (klarinett), Guy Eshed (fløyte) og Sivan Magen (harpe). Blant komponistane finn me Ravel, Elgar, Ives, Debussy, Stravinsky og Sibelius, men byr også på eldre komponistar som Beethoven og Schubert.