No. 4 i Hellebergshillaren

Måndag kunne konsertnemnda avsløra årets artist i Hellebergshillaren, den vakre konsertstaden i skogen mellom Ølve og Hatlestrand.

Seint om kvelden laurdag 26. august vert bandet No. 4 å høyra i hillaren.

– No. 4 spelar musikk for dei som akkurat ikkje hamnar på pallen. For dei som er heime, men som drøymer om å vera ute. Etter utgjevinga av deira debutalbum, «Henda i været», har interessa rundt trioen tatt av, og dei har hausta hyllest frå både publikum og ameldarar, opplyser konsertnemnda på Facebook.

No. 4 er eit oslobasert band beståande av Emilie Christensen, Ingeborg Marie Mohn og Julia Witek. Plata «Henda i Været» er eit resultat av 14 års vennskapog 8 år som band. I det siste har trioen samarbeidd med De Lillos og ikkje minst Jonas Gahr Støre på Ap sitt landsmøte.

– Live har etterspørsla vakse fort, og på få år har bandet gått gradene frå å spela i Parkteatret til Rockefeller, og seinast sjølvaste Sentrum Scene. I 2017 tar bandet med seg musikken sin og speler for gamle og nye fans over heile landet, heiter det i omtalen.

 

Naturleg amfi

Hellebergshillaren ligg som nemnt midt i tjukkaste skogen mellom Hatlestrand og Ølve. Han er omlag 100 meter lang og 15 meter djup. Hillaren har naturleg amfi, og det har blitt laga mobile sittebenker med plass til omlag 260 personar. I hillaren har det vore vunne ut kleberstein til byggjevyrke og ymse i hundrevis av år. Sist på 1700-talet.

– Denne kvelden vert det skipa til konsert inne i hola, og det vil garantert bli ei oppleving ein ikkje finn liknande til nokon stad, lovar konsertnemnda.