Ny journalist i Grenda

Den nye journalisten i Grenda er ikkje nemneverdig glad i merksemd, og synest det er kjekkare når andre får ros og kjem i rampeljoset enn han sjølv. Men Cato Leganger er glad i å formidla, både munnleg og skriftleg.

I det siste har han vore lærarvikar på Malmanger skule, men han har hatt sommarjobb og frilansoppdrag i Grenda tidlegare også.

– Eg har hatt det fint som lærar, og trivest som journalist, seier 33-åringen.

Han vert vikar i redaksjonen dei neste månadane medan redaktør Håvard Sætrevik har permisjon. Medan sjefen er vekke er det Morten Nygård som har teke på seg redaktøransvaret.

Cato vaks opp på Løfallstrand, og har budd i både Bergen, Belgia og i Henningsvær. Han har studert naturgeografi, historie og journalistikk, og har også teke ein del kurs relatert til ski og klatring. I haust kjøpte han hus på Mel i Rosendal. Cato er sambuar med Marita, men for tida er ho i legeturnus på Sunnmøre. Så no er berre Cato og hunden Fnugg heime i huset på Mel.

 

Mykje på tur

– Og kven er du? Ein enkel gut frå Løfall?

– Om eg er enkel? Både ja og nei. Eg er ein person som dyrkar og gler meg over dei enkle tinga i livet, men eg er også særs interessert i dei djuptgåande grunnane til kvifor ting hender i samfunnet og verda generelt – det som føregår i «skuggane», seier Cato.

Med det enkle meiner han gleda over nærleiken til naturen, det naturlege og solide. Cato er mykje på tur, anten han klatrar, går på ski eller berre er ute i naturen. Han trivest godt i sitt eige selskap.

– Det handlar om å vera til stades i augeblikka og nyta det utan stress. Gleda over å sitja med ein kopp kaffi tidleg om morgonen med ei god radiosending eller eit godt blad – eg er a-menneske og likar ein alpin start på dagen, smiler han.

Cato set pris på den gode samtalen, om alt og ingenting. Han gler seg til å finna gode historier frå lokalmiljøet og formidla dei i avisa.