Samla seg om kunstbutikk

Sju lokale kunstnarar er involverte i den nye kunstbutikken i Skålafjæro i Rosendal.

Det var målaren Elin Flindt og tekstilkunstnaren Anne-Marie Bottolfsen som kom på ideen om å laga til ein kunstmarknad i sommar. Formelt er det seks damer i Rosendal Maleklubb som leiger lokalet; Ingrid Skeie, Kristlaug Bjørke, Solbjørg Paulsen, Anna Kristina Matre, Karin Sandvik og Elin Flindt.

– Lokalet stod ledig i sommar, og så tenkte vi det kunne vera artig å laga til ein marknad slik at turistane har noko å sjå på. I butikken sel vi mellom anna måleri, lappetepper, perlebinderi, keramikk og litt brukt, seier Elin Flindt om butikken som har ope kvar dag fram til 22. juli.

Dei fyrste 14 dagane hadde vore travle.

– Vi kjem i prat med mange kjekke folk, så kvar einaste dag har vi hatt det så gøy. Vi må òg vera turistvertar, for det er stadig nokon bort og spør om vegen til Trolltunga. Vi har såleis prøvd oss på både tysk og engelsk, smiler Flindt, som melder om ekstra stor trafikk når Hardangerfjordekspressen kjem til kai.

 

Ikkje plasttroll

Om det også blir sommarmarknad til neste år, er ikkje bestemt enno. Men i så fall kan det verta aktuelt å invitera med endå fleire kunstnarar og handverkarar.

– Vi sit heile vinteren og lagar ting, og det er kjekt å kunna visa det fram på denne måten. Viss folk set pris på tiltaket, så må dei også vera greie å nytta seg av det, det gjeld både fastbuande og turistar, seier Elin Flindt.

– Om nokon vil kjøpa av oss, så er det endå kjekkare. Salet har vore bra så langt, spesielt set turistane pris på å kunna kjøpa suvenirar som er handlaga lokalt, i staden for plasttroll «Made in China», legg Anne-Marie Bottolfsen til.