Seimsfoss grendalag er prisnominert

Kvinnherad kommune har sendt inn forslag om å tildela Kulturlandskapsprisen i Hordaland til Seimsfoss grendalag.

– Dei seinaste åra har Seimsfoss grendalag hatt spesielt fokus på å henta fram og ivareta kulturminne knytte til jordbrukslandskapet langs Guddalselva, og gjera desse tilgjengelege for ålmenta. Det gjeld både fysiske og immaterielle kulturminne, innleiar rådmann Odd Ivar Øvregård i forslagsbrevet.

Han trekkjer fram kverna som vart fullrestaurert i 2011, laftehuset/bakehuset frå 1700-talet, og laksetrappene som elveeigarlaget står bak. Havforskingsinstituttet sin forskingsstasjon vert også nemnt som eit av dei spennande tiltaka som omkransar Guddalselva. Til slutt i søknaden vert elveparken og stien gitt ros.

– Staden er blitt ein god møteplass for bygdefolket, og til rekreasjon for mange. Frå Fv 48 og opp til Nyabruo er det bygt nær sagt samanhengande sti langs elva. For turgåarar av alle slag, og for rullestolbrukarar og for barnevogntrillarar, har dette vorte ein ynda turveg, heiter det.