Skal utvikla EU-prosjekt

Forfattar Anders Totland har fått eit engasjement i eit stort EU-prosjekt som skal engasjera ungdom til å lesa litteratur og utfalda seg i kreativ skriving.

Skudeneshavn internasjonale litteratur- og kulturfestival (SILK) har kome med som ein av sju partnarar frå seks land i eit fireårig prosjekt i EU sitt kulturprogram Creative Europe. Prosjektet vert leidd av Haugaland vidaregåande skule, og det er første gong ein norsk institusjon leier prosjektet gjennom ein periode. Prosjektet har fått tittelen Read On, og skal stimulera unge til auka interesse for litteratur og inspirera dei til å skriva sjølv. Fordi Totland har delteke på SILK fleire gonger, har han blitt spurd om å jobba med prosjektet. Og sidan han har 50 prosent permisjon frå journalistjobben i Sunnhordland frå januar 2018, har han no tid til å engasjera seg i dette.

– Prosjektet kan opna for store ting om eg tek dei sjansane som byr seg, og dette er heilt klart ein del av satsinga mi som forfattar. Men det vil uansett vera kjekt å vera med på dette spanande prosjektet, seier forfattaren som no er i ferd med å få si andre bok utgjeven på dansk.