Startar med take away-bibliotek
Kvinnherad bibliotek har fått løyve frå smitteverngruppa i kommunen til å tilby take away-tenester frå biblioteket. – No kan vi låna ut bøker, filmar og tidsskrift trass i stengte dører, vert det opplyst.
I ei pressemelding fortel biblioteket korleis det nye tilbodet fungerer.
Artikkelen held fram under annonsen.
«Du tek kontakt med oss med dine ynskje. Vi lagar klar ein pose med bøker/filmar/tidsskrift som du kan henta utanfor biblioteket til avtalt tidspunkt. Du får ein SMS når du kan henta. Du kan velja enkelttitlar, men vi kan også laga bokpakkar til deg, til dømes morosame og spennande bøker til 10-åring, hagebøker og krim til påska», vert det opplyst.
Biblioteket vil halda fram med tenesta også etter påske, om situasjonen er den same.
«For grupper som ikkje er så mobile, bur langt unna eller sit i karantene, kan vi tilby levering av bokposar på døra. Det vert levering etter kapasitet avhengig av kor stor pågangen blir», legg biblioteket til.
Tiltaket er godkjent av kommuneoverlegen. Bøker/filmar/tidsskrift som blir leverte inn vert sett i karantene i éi veke for å vera heilt sikker på det ikkje er smittefare i materialet lenger.