Startar opp gospelkor

Husnes og Holmedal sokn startar opp gospelkor for ungdomar i alle aldrar.

I ei pressemelding skriv Husnes og Holmedal sokneråd at fleire har vore i kontakt og synt interesse for eit lokalt gospelkor. Difor har soknet no vedteke å starta eit slikt kor, med hjelp av Tone R. Hellesøy som musikalsk leiar.

«Koret er tenkt for ungdommar i alle aldrar – til dømes dei som har vore med i Ten Sing før, dei som skulle ynska dei hadde vore med i Ten Sing, og dei som er så unge at dei aldri har høyrd om Ten Sing. Dei treng ikkje vera komande superstjerner, men dei fleste bør lika å synga, styra med lyd, eller spela eit instrument. Dei er velkomne same kva kyrkje dei er medlem i – eller ikkje», opplyser Ann Helen Collins på vegner av Husnes og Holmedal sokneråd.

Mottoet deira blir «Get Together». Det skal verta eit sosialt kor, og kvar gong dei møtest blir det lova pause med litt å eta og drikka. Oppstart er tysdag 5. mars i Valen kyrkje.

«Koret ynskjer songglade frå heile kommunen velkomne», skriv Ann Helen Collins.