Startar Rosendal Kammermusikkfestival
I august tar Leif Ove Andsnes med seg musikarar i ypparste verdselite til Rosendal for å laga fire dagar med kammermusikkfestival.
– Eg tenkjer på dette som ein høgkvalitets festival, også internasjonalt sett. Dette skal bli ein spydspiss blant kammermusikkfestivalane i Norge. Slik ambisjon må eg også ha om eg skal vera med på noko slikt som dette, seier Leif Ove Andsnes.
Onsdag var han på besøk i Baroniet, slik han også har vore kvar av dei 21 siste sommarane. Han har sysla med tanken om å laga til ein festival for klassisk musikk i Rosendal i fleire år. No er festivalen klar for å sleppast ut, og dei er lovde fire millionar kroner frå Christian Gerhard Jepsens Stiftelse. 1,5 av dei millionane blir brukte til å kjøpa to nyrestaurerte flygel frå London. Resten går til å drifta dei første tre åra av festivalen. For dette blir årvisst.
Artikkelen held fram under annonsen.
– Utan slik støtte hadde ikkje dette gått. Me er allereie i gang med å planleggja 2017-festivalen. Dette er noko me tenkjer langsiktig om. For å lukkast med ein festival som dette treng me ein solid organisasjon, og der har me Baroniet Rosendal som ei trygg støtte, seier Andsnes.
Den nye festsalen i Avlsgården, Riddarsalen, blir arena for tre konsertar, medan det blir to konsertar i Kvinnherad kyrkje og to i Baroniet.
– Den nye salen i Avlsgården får plass til 400 publikummarar, det same som kyrkja rommar. Me trur dette vil vera interessant for publikum i Kvinnherad, men også kunna trekkja publikum frå både inn- og utland. For det blir verkeleg høg kvalitet på festivalen, understrekar Andsnes.
I festivalen, som går frå 11. til 14. august 2016, får Leif Ove Andsnes selskap av både norske og internasjonale utøvarar, Bertrand Chamayou og Jie Zhang (klaver), Vilde Frang og Guro Kleven Hagen (fiolin), Eivind Holtsmark Ringstad (bratsj), Frida Fredrikke Vaaler Wærvågen og Sol Gabetta (cello), Marius Flatby (kontrabass), Brentano Strykekvartett, Matthias Goerne (baryton), Mari Eriksmoen (sopran), Sharon Kam (klarinett), Peter Whelan (fagott) og Ragnhild Lothe (horn).