Statsministeren svarte borna

Statsministeren lova vår og sommartid i snarleg vente, men kan korkje snu klokka eller hindra regnvêr i Omvikdalen. Det er essensen i brevet frå Erna Solberg til borna i Omvikdalen barnehage.

8. februar sendte pedagog Bente Haugen eit brev til statsministeren på vegner av borna, der dei bad om permanent sommartid. Problemstillinga i barnehagen er at om vinteren skuggar Nonshaug for sola, slik at ho forsvinn klokka 13.

– Det er for tidleg. Hadde vi hatt sommartid heile året, ville klokka vore 14 før skuggen kom. Vårt ønske til deg og regjeringa er: sommartid heile året slik at sola skin lengre utover dagen og i heile utetida vår, skreiv dei i brevet som sjølvsagt fekk følgje av flotte barneteikningar.

 

Tok problemet opp med tidsministeren

Allereie 20.februar svarte Erna Solberg borna med eit personleg brev, der ho takka for flotte teikningar.

– Eg er sjølv frå ein stad som ligg omkransa av fjell, kor det er ganske få dagar med sol, nemleg Bergen. Eg forstår godt de synest at sola blir veldig tidleg borte om vinteren. Eg har snakka med tidsminister Monica Mæland, som også er frå Bergen, om at de ønskjer sommartid heile året, skreiv statsministeren i brevet til borna.

Men å endra på sommartid og vintertid, det kunne ho ikkje hjelpa med.

– Dei fleste landa rundt oss har sommartid berre i sommarhalvåret, og når ein skal reisa til desse landa er det praktisk at vi brukar same tid, argumenterte ho.

Trass i at ho såg seg nøydd til å behalda tidsordninga slik vi har ho i Noreg, avslutta ho med å seia at no går det raskt mot vår og sommar.

– Då er det ekstra fint å tenkja på at med sommartid frå slutten av mars, kan vi utnytta dei ljose delane av døgeret enno betre, skreiv Solberg og ønskte alle borna i barnehagen ein god vår og sommar med mykje sol mellom berga i Omvikdalen.

 

Stas å få svar

Håvard Lyngnes Haavik, Leander Lønning, Alida Guddal Hjelmeland, Alida Omvik Hansen og Julie Røysland syntest det var stas å frå svar frå statsministeren.

– Dei var smilande, litt raude i kjakane og forventingsfulle då vi las opp brevet som hadde gullstempel frå statsministeren sitt kontor, fortel Bente Haugen.

Grenda tok seg ein tur ut til barnehagen i går for å høyra kva borna syntest om svara frå Erna Solberg.

– Vi spurde ho om vi kunne få mykje sol. Ho kunne fiksa det med ein gong. Sjå ut, då! Sol og vind! Og det pleier jo å vera regn, vind og storm, sa Leander Lønning.

– Men korleis ville det blitt om vi fekk sol heile tida?

– Nei, vi måtte hatt pittelitt regn, sa Leander.

– Vi kunne ha teke ei vasskanne og vatna med den, meinte Håvard.

– Men kor skulle det vatnet ha kome frå, om det ikkje regna, lurte bladfyken.

– Frå tanken. Vi kunne brukt mjølk frå mjølketanken, var det enkle svaret på det.

– Nei, eg har sett korleis det verkar. Det regnar, så kjem det ned i eit røyr og blir soge bortover. Der borte opnar røyret seg, så vatnet fer ut i jorda, og då gror det. Då blir det kjempefint ute. Eg ventar berre på at dei der blomane skal bløma, sa Leander.

– Og det skjer snart. Erna lovde oss sommartid ganske raskt, i slutten av mars allereie, blunka Bente Haugen.

– Ja, det var noko ho kunne hjelpa oss med, men ikkje alt, hugsa Leander.