Tenorar, Bremnes og Boine
Populære artistar på rekke og rad skal opptre på Baroniet Rosendal dei neste dagane.
Torsdag kveld avsluttar Bjørn Eidsvåg sin tre dagar lange serie med utselde konsertar på Baroniet. Totalt har kring 1.250 publikummarar fått høyra den vidgjetne artisten. Det betyr ikkje at det vert ein pause i kulturprogrammet, snarare tvert imot. Fredag kveld held nemleg Ketil Bjørnstad klaverkonsert i Den røde sal, og på laurdag kjem Tenorane til Riddersalen. Aasmund Kaldestad og Henrik Hundsnes har no med seg ein ny medlem, nemleg svensk/tysk/engelsk/amerikanske David Fielder, som har budd store deler av livet i Bergen.
– Vi er ganske internasjonale, skjønar du. I gruppa vår har vi litt rotasjon på operatenorane, så David har ikkje vore i Rosendal før. Vi skal snart opptre på Chat Noir, og konserten på Baroniet er siste stopp før vi dreg til Oslo, fortel Aasmund Kaldestad til Grenda.
Artikkelen held fram under annonsen.
Skikkeleg fint
Framsyninga i hovudstaden har fått tittelen «Tenorane syng skikkeleg fint på Chat Noir».
– Men vi lovar å synga skikkeleg fint på Baroniet også. Det er alltid kjekt å koma dit, det er ein av favorittplassane våre, opplyser Kaldestad.
I neste veke er det klart for tre storkonsertar på rappen. Tysdag og onsdag skal Kari Bremnes med band i aksjon i Riddersalen. Torsdag kveld skal Mari Boine opptre same stad med bandet sitt.
Så det er berre å gle seg til nye, fantastiske kulturopplevingar på Baroniet.