To nye band klare for Festidalen

Raga Rockers og Fagernes Yacht Klubb er dei to siste tilskota til årets festivalplakat.

Det vert med andre ord både storslått rock og skyhøg allsongfaktor oppe på Dønhaug den siste helga i juni.

– Raga Rockers er ein bauta i norsk rock. Bandet står breibeint og støtt i både fortida og framtida til sjangeren. 17 plater og ein million konsertar i ryggmargen gir resultat, skriv Festidalen i ei pressemelding.

 

– Tidenes partydrink

I tillegg til dei gode gamle rockarane, som blant anna står bak store hitar som «Hun Er Fri», «Noen å Hate» og «Slakt», har bookingjengen til Festidalen også klint til med eit coverband i Fagernes Yacht Klubb.

– Det er ikkje ofte vi hyrer inn coverband. Det kjem heller ikkje til å bli ein ny trend. Men med Fagernes Yacht Klubb tilgjengelege, kjentest det rett og slett som umogleg å motstå. Dette er tidenes partydrink, står det å lesa i pressemeldinga.

Fagernes Yacht Klubb er blant anna omtala som Bergens beste liveband og eit live-fenomen utan sidestykke av Bergens Tidende.

 

Halvegs i mål 

Fagernes Yacht Klubb og Raga Rockers vert skriven inn på ein plakat som allereie består av Hkeem, Fanny Andersen, Lars Vaular og I am K. Noko som betyr at Festidalen er vel halvvegs i hamn med årets program.

– Med Raga og Fagernes sukrar med popsatsen vår med brei rock for å få rette eksplosiviteten i sluttresultatet. Raga er klassisk, tydeleg, biletleg og botnsolid. Medan Fagernes er reinspikka positivitet, fest, sjarm, danseglede og eit band alle på arenaen kjem til å elska. Med sine 15 medlemmer vert dette det største bandet me har hatt på scena i Festidalen-soga, seier bookingsjef Daidalos Dale til pressemeldinga.