Vann 100 Dagar – skal spela på Festidalen
Med sin miks av 80-talspop og moderne rock spelte car.pool seg til topps i 100 Dagar førre helg. Det betyr at dei er Vestlandssatsinga 2020.
Det betyr også at Festidalen-publikummet får sjå dei på Dønhaug i sommar.
Artikkelen held fram under annonsen.
– Det er eit vanvitig kult band med eit sabla potensiale. Stilige som berre juling på scena, og ein smart miks av 80-talspop og moderne rock, skriv Daidalos Dahle i ei pressemelding.
Han vart imponert over det dei hadde å visa under 100 Dagar på Stord førre helg, og håpar å gje car.pool ein skikkeleg festplass mellom Kjartan Lauritzen og Gabrielle under sommarens festival på Dønhaug.
– Dei sparka i gang festen og serverte ein gloheit konsert utan eit einaste keisamt sekund. Ungdommeleg energi og speleglede, med moderne ferdigheiter og rå teft for å smi fram über-catchy låtar, står det å lesa i pressemeldinga.
Som vinnar av 100 Dagar vert bandet Vestlandssatsinga 2020 og blir å sjå på festivalscener rundt om i heile regionen, der i blant på Festidalen og OmStock.