Vil du vera frivillig på Festidalen?

Festidalen manglar framleis 100 frivillige, så om du har lyst til å bidra til årets festival er det berre å melda seg til teneste.

– No nærmar det seg veldig og vi gler oss stort. Når det kjem til frivillige så manglar vi framleis ein god del, men det er ikkje meir enn det pleier å vera så kort tid før festivalstart. Men vi treng folk til det aller meste, så det er berre å hiva seg rundt, seier frivilligsjef Mona Enes.

Særskild til opp- og nedbygging av scene, nattevakter på område og på camp treng Festidalen folk.

– Men uansett så skal vi klara å finna noko til dei som ynskjer å vera med. Hos oss er alle velkomne og vi lovar å ta godt vare på deg. Det er både sosialt og kjekt å vera frivillig på Festidalen, vi storkosar oss heile helga, seier Mona.

I tillegg til å bli ein del av fellesskapet, er den store gulrota for å bli med at ein får festivalpass til den dagen ein ikkje jobbar. Men kastar ein seg rundt før 15. juni kan det vanka enno ein premie.

– Vi har ein goodiebag som blir trekt ut til ein av dei som har meldt seg som frivillig innan 15. juni. Det er ein pose med litt forskjelleg festivalknask oppi til ein verdi av 1000 kroner. Så det er berre å melda seg på, anten på nett eller til oss. Har du eit spørsmål så er det berre til å ta kontakt. Dette blir kjekt, seier ho.