1. divisjonsjubel for firemåls-Ina

Som eit av fire Kvinnherad-lag, spelar Rosendal/Uskedal J14 i haust i 1. divisjon. Sundag viste dei seg fram med ein solid siger.

Livet i toppdivisjonen krev gjerne litt tilpassingstid, men fire kampar ut i førstedivisjonssesongen, har 14-årsjentene til Rosendal/Uskedal plukka med seg seks poeng. Dei tre siste av dei kom etter ei solid oppvising på heimebane på sundag. Og motstandar Sotra fekk oppleva ein sjokkstart på oppgjeret.

Før det var gått ti minutt hadde kaptein Ina Tveito Sandvik laga to, og Silje Soldal stupheada inn eit mål, etter innlegg frå Sandvik.

Trenar Tor Gundersen er full av lovord etter kampen.

– Heilt fantastisk. Første omgang er heilt rå, skryt han.

 

Respekt

Sjukdom og skadar førte til at Gundersen måtte endra ein del på laget undervegs. Alle 18 på dommarkortet fekk bra med speletid i storsigeren.

– Me klarar oss veldig godt også etter bytta, sjølv om det går ut over strukturen vår, vurderer trenaren.

– Det verka så dei hadde stor respekt for oss, av ein eller annan merkeleg grunn. Me har hatt to store tap før denne. Men jentene gjorde det me var samde om å gjera før kampen, og får til det me har trena på i det siste. Då kan eg ikkje seia anna enn at eg er fornøgd, smiler Gundersen.

Som tidlegare keeper gler han seg over godt målvaktspel.

– Me ei veldig solid sisteskanse i May Beate, i tillegg til eit godt forsvar, som legg grunnlaget for poeng, meiner han.

 

Måltjuv

Men han kan også prisa seg lukkeleg over å ha Ina Tveito Sandvik på spissplass.

– Ho har ein veldig bra kamp. Fire mål og ein målgjevande, og skaffar straffa som ho sjølv omset til 5-1, oppsummerar Gundersen stornøgd.

– Det var enkelt og greitt å spela spiss på ein dag som i dag, seier Ina sjølv, utan å ty til store fakter.

Om halvanna veke skal ho på sonesamling, mellom anna saman med lagvenninnene Lene Omvik Furdal og Guro Klette Leganger. Då var det inga ulempe at sonetrenar Kjetil Lothe sat på tribunen og såg Sandvik herja med blåkledde strilejenter.

Og ho trener stort sett kvar dag.

– Eg er ganske mykje på kunsten, vedgår ho.

Landslaget er målet for 8. klassingen, som er eitt år yngre enn mange av dei ho spelar både med og mot.

– Dette er det kjekkaste eg gjer på. Og me har eit godt miljø her på laget, sluttar den forsiktige måltjuven.