«15 nye år med Skjersholmane?»

Det er interessant å følgja debatten om nytt ferjesamband Kvinnherad – Stord. Mest av alt er det folk sine personlege og fastlåste oppfatningar som dominerer lesarinnlegga i aviser og på nett. Det går også igjen hjå mange av dei som ytrar seg, at dei veit best kva alternativ som må veljast.

Eg har inga tru på ei god løysing – denne gongen heller. Det byggjer eg på følgjande fakta:

1. På Stord er det massiv motstand mot å byggja nytt ferjeleie. Folkemeininga vil nok sigra der.
2. På Halsnøy finst det knapt nokon som ser andre alternativ enn Ranavik, evt. Klosterneset.
3. På fastlandssida i Kvinnherad, der dei fleste bur, er det størst entusiasme for Sunde. Mange likar ikkje tunnelen og vegen over Halsnøy når dei skal med bil til Stord, og tenkjer seg heller ei ferje til Jektevik.

Heldigvis har vi snøggbåtar mellom kommunane for dei som har ærend på Leirvik. Dei går titt og ofte. For oss som skal sørover med bil er Utåker – Skånevik-sambandet og Sydnes – Utbjoa gode alternativ. Og skal vi til Bergen er det ikkje noko som er meir tenleg enn turen over Årsnes – Gjermundshamn. Så kvifor dette veldige engasjementet for nye ferjestø her og der, med store inngrep i naturområde og høge kostnader? Dei som er framsynte nok kan heller engasjera seg i Kvinnherad si tilknyting til E39 og sørleg kryssing av Langenuen. Mange gløymer at dette kanskje er det aller viktigaste – på lang sikt.

Så får vi heller tola 15 nye år med ferje til og frå Skjersholmane, evt. til Jektevik, om vi absolutt skal til Stord med bil. Til Haugesund og Bergen finst det som sagt gode alternativ.

 

Lesarbrev av Kristian Hus, Husnes.

 

[gravityform id="11" title="true" description="true"]