1,75 milliardar til lokale verksemder i kommunane

Stortinget har vedteke å gje 1,75 milliardar kroner til kommunane, slik at dei igjen kan kompensera lokale verksemder som er råka av dei nasjonale eller lokale smittverntiltaka.

– Mange verksemder rundt omkring i landet er svært hardt råka av dei skjerpa smitteverntiltaka som vart innført på nyåret. Det er kommunane som kjenner det lokale næringslivet best og veit kor skoen trykker. Desse pengane skal fordelast på ein rask og enkel måte, slik at dei ulike bedriftene som ligg med brekt rygg vil kunna koma seg gjennom krisa, seier distrikts- og digitaliseringsminister Linda Hofstad Helleland i ei pressemelding.

 

1,2 mill. til Kvinnherad

Desse midlane kjem i tillegg til dei 250 millionane som regjeringa løyvde til støtte for lokalt næringsliv i desember i fjor.

– Mange kommunar har hatt stort smittetrykk og strenge smittevernreglar den siste tida. No gir regjeringa desse kommunane midlar til å kompensera lokalt næringsliv som er spesielt hardt råka, seier kommunale- og moderniseringsminister Nikolai Astrup.

Av dei 1,75 milliardar kronene så går 136,6 millionar til kommunar i Vestland. Kvinnherad kommune får 1,2 millionar kroner som dei skal fordela ut til verksemder som er hardt råka av koronakrisa. Kven som får er heilt opptil kommunen å bestemma.

 

Dei som treng det mest

Kommunane får nemleg betydeleg fridom til å støtta dei verksemdene som treng det mest. Det kan for eksempel vera verksemder innan reiseliv-, arrangement- eller serveringsbransjen som har opplevd ein auke i kostnadar eller økonomisk tap som følgje av smitteverntiltak og nedstenging.

Men midlane skal også fungera som ei ventilordning for verksemder som heilt eller delvis ramlar utanfor den generelle kompensasjonsordninga.

– Dette har vore ei viktig prioritering frå oss for å hjelpa dei som ikkje nødvendigvis treffast like godt av kompensasjonsordninga. No kan kommunane raskt og effektiv hjelpa bedrifter som vert hardt råka av lokale og nasjonale smitteverntiltak. Dette gjeld særleg små og mellomstore bedrifter innan reiselivs- og serveringsbransjen, seier næringsminister Ida Nybø i pressemeldinga.