3 meter lang flenge i skutesida

Alt tyder på at MF «Hordaland» hamna altfor nær land på veg til Varaldsøy i dag tidleg. Lekkasjen er no så å seia tetta, og det vert vurdert om det er forsvarleg å slepa ferja til Halsnøy i kveld.

Grenda snakka med regionsjef Inge André Utåker i Norled klokka 15.15 torsdag ettermiddag for å få siste nytt frå Varaldsøy.

– Taubåten vert kraftig forseinka fordi han fyrst måtte innom Rosendal for å ta om bord eit straumaggregat. No har eg fått lovnad om at han vil koma til havaristen om ein halvtimes tid. Ferja er nesten heilt tett no og det er lite vatn igjen om bord, seier Utåker om statusen.

 

Elektroniske spor

Spørsmålet no er om det er forsvarleg å slepa «Hordaland» til Halsnøy Dokk i kveld.

– Det vert vurdert om den mellombelse tettinga er god nok. Det er jo eit temmeleg rufsete vêr ute, så vi må vera heilt trygge på at ferja toler transporten før vi kan ta ut. Både Sjøfartsdirektoratet, vår eigen inspektør og ein såkalla «Salvage Manager» er på staden for å undersøkja dette nærare, fortel regionsjefen.

Å finna årsaka til havariet er ikkje det som hastar mest for Norled, men mykje byrjar likevel å bli klart.

– Alt tyder på at ferja har gått på grunn heilt på sørenden av Varaldsøy (ved Skjelnesodden), akkurat i det ho skulle runda neset for å gå opp langs vestsida av øya. Både korleis skaden ser ut og dei elektroniske spora ferja la etter seg tyder på at ho enda opp altfor nær land, seier Utåker.

 

Ubehageleg

– Korleis ser skaden ut?

– Flenga er om lag 3 meter lang og 5 cm brei. Til saman blir det eit ganske stort hol, og det er mykje vatn som kjem inn. Flenga er 2 meter under vassoverflata, opplyser Inge André Utåker.

Ved Skjelnesodden er det enno om lag fem minutt til ferjekaien på Varaldsøy. Med vatn straumande inn var situasjonen dramatisk nok.

– Eg har forstått det slik at folk tok det relativt roleg, men det er klart det kjennest ubehageleg å måtta ta på seg redningsvesten.

Torsdag ettermiddag vart MF «Fitjar» sett inn som ferje nummer to på sambandet, i tillegg til «Gloppen». Kor tid det er mogleg å anløpa Varaldsøy igjen, er førebels umogleg å seia.