75-åring frå Uskedalen har fått seg sommarjobb i Olden

Jan H. Sunde, kjend frå reiselivet i Bergen, er 75 år og har sommarjobb på Olden Fjordhotell.

Eigentleg skulle han vore reiseleiar for norske turistar på bussturar til fleire land i Europa. Slik vart det ikkje i år. Koronaen sette ein stoppar for utreise. Dermed kasta Jan Sunde seg rundt og vart altmoglegmann på fjordhotellet i Olden.

 

Skulle vore guide i Europa

Nettstaden har snakka med den 75 år gamle reiselivsmannen frå Uskedalen om hans nye sommarjobb i Olden. Frå 19. juni til slutten av august er Sunde resepsjonist og nattevakt. Ikkje nok med det. Dersom det er trong for han, tek han tørn i oppvasken, som servitør på frukosten, som barkeeper og som vaktmeister med mellom anna plenslått. Han er med andre ord ein altmoglegmann og får oppleva å vera på andre sida av resepsjonsskranken.

Planen i sommar var eigentleg ein busstur til Rimini i juli, vera reiseleiar på to turar til Georgia og Armenia i august og til slutt tre turar til Moldova og Odessa i september og oktober. Men alt vart skrinlagd.

 

Møte med menneske

Då tok ein kjenning, som er engasjert som hotellsjef på Olden Fjordhotell, kontakt og ville ha Jan med seg på drifta i Olden. Slik vart det. Hotellet opna for sommaren med fem kollegaer på jobb. Dei ville då sjå kva trafikk som venta denne spesielle sommaren. I dag er hotellet nesten fullbooka.

Mange kjenner Jan H. Sunde som leiar for bussturane i Run Way Norway, og frå 1992 i Run Way Unitur, det som i 2008 vart Tide. Han har engasjert seg og hatt viktige oppdrag for Bergen Næringsråd, ikkje minst ved å arrangera store reiselivskonferanse i vestlandshovudstaden.

– Motivasjonen er møte med menneske. Og når ungdomen ikkje vil ta sommarjobb, så få vi godt vaksne trø til, seier Jan til Uskedalen.no.

 

Tekst: Kristian Bringedal, Uskedalen.no.

Foto: Olden Fjordhotell