Allereie klart for nyopning

14 dagar etter at Peder Bakar meldte oppbod, er det klart for nyopning av kafeen i Skålagato. Allereie no på torsdag er det meininga at dørene skal opnast igjen.

Det er systrene Margreta og Hilde Hus som skal overta lokala. Dei driv i dag gåvebutikken Fristelsar i Skålagato i Rosendal, og skal no ta med seg butikknamnet og ein del av varesortimentet – fyrst og fremst krydder, oljer og snop - med seg ned til der Peder Bakar dreiv. I tillegg vil dei sjølvsagt by på bollar og tebrød, påsmurte skiver og bagettar. Brødmaten skal leverast av Leirvik dampbakeri.

– Vi tenkjer òg på servera supper og salatar. Men vi får sjå etter kvart, og tek gjerne i mot innspel frå publikum. Vi set pris på alle tilbakemeldingar om kva folk ynskjer, seier Hilde.

Tysdag 21. juni meldte Pederen oppbod. Då gjekk det raskt i svingane hjå systrene Hus.

– Hilde var på ferie, men eg ringte og sa at lokala var ledige og spurde om vi skulle overta. Så fekk vi overta no på fredag, og éin time seinare stod vi og måla, ler Margreta.

 

Rekk fellesferien

Dei planlegg opning allereie no på torsdag. slik at dei rekk fellesferien. At lokala midt i Skålagato vert tekne i bruk igjen, ser dei på som viktig både for fastbuande og turistar. Og behovet ser ut til å vera der.

– Då vi stod og måla på laurdag var det folk og riksa på døra heile tida, fortel Hilde.

Duoen ynskjer naturleg nok å setja sitt eige preg på lokala. Mykje blir såleis nymåla, og i dag vert golvbelegget skifta.

– Og så skal vi ein tur til Espe for å henta eplekassar. Meininga er å leggja varene vi tek med oss frå dagens butikk og leggja i dei kassane. Det handlar om å skapa lokala litt om, slik at det blir vårt, understrekar Margreta.

 

Stilskifte

Dagens butikk vil halda ope ein liten periode framover, før den vert stengt. Men systrene ser gjerne at nokon vil overta og driva dagens konsept vidare. Deira eige stilskifte har på sett og vis lege litt i korta.

– Vi har jo hatt kaffi og litt småtteri her, og stadig lurt på å utvida den delen. Når desse lokala plutseleg vart ledige, så var det berre å hiva seg rundt, seier Margreta Hus.

– Kva blir spesialiteten dykkar?

– Det må vera oss to det, melder Hilde og ler høgt.