Amerikansk beist på Varaldsøy

For ei god veke sidan halte Ivar Dybsland opp ein 47 cm stor hummar frå Bygdavågen på Varaldsøy.

– Det var noko svære greier. Det er eigentleg ikkje plass i hummarteina til han. Eg forstår knapt korleis han har kome seg inne, seier Ivar Dybsland.

Den pensjonerte politimannen har hytte på Varaldsøy, og har fiska i farvatna i mange år. Han har ikkje fått ein slik hummar før. På biletet har han stilt den utanlandske hummaren på sida av ein norsk variant på kring 30 cm lengde.

– Denne hummaren dekka omtrent heile teina. Det er faktisk eit problem å få fiska dei opp, for dei kjem seg eigentleg ikkje inn i teinene, så store som dei er, seier Dybsland.

Ruggen frå Amerika var 47 cm stor, og er førebels ikkje eten opp.

– Han vart oransje i fargen då han vart kokt, i motsetnad til «vår» hummar som jo vert raud, fortel fiskaren.

 

– Sjeldan

I ein artikkel hos Havforskingsinstituttet publisert i mars i år, kjem det fram at det er gjort sporadiske funn av amerikansk hummar langs kysten av Norge

– Ein veit ikkje kor effektivt hummarfisket avdekker førekomst av amerikansk hummar, men det er foreløpig lite som tyder på at det finst eit stort tal amerikanske hummar i Norge. Funna har så langt vore sporadiske, skriv Ann-Lisbeth Agnalt, forskar ved Havforskingsinstituttet i saka.

Den amerikanske hummaren kan vera smitteberar av bakteriesjukdommen «Gaffkemi», som ved smitte til europeisk hummar gir 100 prosent dødelegheit. Norske hummarbestandar er på et historisk lågmål, og vil truleg vera ekstra sårbare i konkurranse med ein introdusert art som dette, legg Agnalt til.