Anbodsprosessen i gang
Dei nye ferjekontraktane for Hordaland vart lyst ut på anbodsdatabasen Doffin rett før påske. Kvinnherad kommune skal om to veker møta Skyss for å koma med sine innspel til prosessen.
Anbodspapira vart lagt ut på Doffin den 16. mars. Ferjesambanda er delte inn i fem rutepakkar, og det vil bli inngått kontrakt for kvar einskild av desse. Det skal skrivast såkalla bruttokontraktar, noko som betyr at Skyss tek inntektsansvaret medan operatøren får kostnadsansvaret.
Ranavik-Skjersholmane, Gjermundshamn-Varaldsøy-Årsnes og Jondal-Tørvikbygd er blant dei fire sambanda i rutepakke 2. Rutepakke 3 inneheld mellom anna Fjelbergsambandet, medan Utåker-Matre-Skånevik ligg i pakke 5. Alle kontraktane får varigheit til 31.12.2028, med opsjon for oppdragsgjevar på eitt år ekstra. Frist for mottak av tilbod er sett til 10. november i år.
Artikkelen held fram under annonsen.
Kvinnherad kommune har allereie skaffa seg anbodspapira.
– Vi skal gå grundig gjennom dokumenta for å sjå kva dette inneber for oss. Vi ynskjer å sikra at Kvinnherad får eit best mogleg ferjetilbod, og har i så måte ein del spørsmål å stilla til Skyss, seier ordførar Peder Sjo Slettebø.
Han og rådmann Odd Ivar Øvregård reiser difor til Bergen den 15. april for å møta Skyss. Etter møtet lovar ordføraren ei fyldig orientering til kommunestyret.