Ane Guro på plass i Mexico: – Det blir utruleg godt å endeleg konkurrera igjen

Ane Guro Tveit Hjortland har ikkje konkurrert i sanden sidan EM-deltakinga i haust. Fredag ventar verdscupsirkuset igjen.

– Endeleg! Det er både gøy og motiverande å få reisa igjen. Vi som er sandvolleyballspelarar er heldige som får moglegheita til dette. Og sjølv om eg kjenner at eg er veldig spent på turneringa som ventar, så gler eg meg stort til å stå på banen i kvalifiseringa her på fredag, seier Ane Guro.

Koronaboble

Verdseliten i sandvolleyball er samla på det mexicanske ferieparadiset Cancun. Ane Guro reiste ned fredag 9. april, og skal leva i ei sandvolleyball-boble der nede fram til 3. mai. I den perioden skal ho spela i tre 4-stjernes verdscupturneringar.

Det internasjonale sandvolleyballforbundet har nemleg komprimert verdsserien for å unngå at utøvarane reiser rundt i alle verdas endar i desse koronatider.

– Vi lev no i ei boble. Alle utøvarane bur på same hotell og må følga strenge koronareglar. Vi må ha munnbind på oss overalt og det er kontinuerleg testing. Så langt har vi blitt testa tre gonger, seier jenta frå Hatlestrand og legg til:

– Men det er veldig bra at det er så strengt. Eg føler meg i alle fall veldig trygg her nede.

Opplading til OL-kvalik

Det er fire norske jenter som har reist ned til Mexico for å delta på dei tre komande turneringane. Dei fire er alle teke ut til OL-kvalifiseringa i austerriske Baden 6. til 9. mai.

– Det er den turneringa i Austerrike som er den viktigaste for oss. Difor vil vi bruka turneringane her i Cancun både til trening og spissing av form. Den er òg viktig med tanke på at vi skal bli kjent med kvarandre på banen, seier Ane Guro.

Ho skal spela dei to første turneringane i Mexico saman med Emilie Olimstad, og den siste saman med Sunniva Helland Hansen, som ho vann NM med i fjor. Helland Hansen vert også makkeren hennar i OL-kvalifiseringa i Baden.

– Det blir gøy. Eg kjenner at formen absolutt er på rett veg om dagen, men du kjenner at det er lenge sidan du har spelt mot lag du ikkje kjenner frå før. Så det er mykje spenning i kroppen. Men det er ein god spenning. Det er godt å kjenna på den nervøsiteten, for då veit du at det betyr noko for deg, seier Ane Guro.