Seks dagar igjen til å stemma på Årets namn

Vi nærmar oss innspurten i kåringa av Årets namn 2021. Har du hugsa å stemma?

Grenda skal også i år kåra Årets namn i Kvinnherad. Etter ein nominasjonsrunde står det no mellom ti verdige kandidatar. Kven som går til topps er det du som avgjer.

Slik røystar du:

Send namnet på kandidaten på;

E-post: post@grenda.no

Telefon: 53487100

Post: Send slippen under til Grenda, Pb 100, 5486 Rosendal

Grenda på Facebook og Instagram, eller i skjemaet under.

Tina Abdulla:

Husnesjenta vart den første utlandsproffen frå Kvinnherad i handball då ho signerte for Borussia Dortmund i 2020. Ho er regjerande tysk meister, og stormar også i år mot eit nytt ligagull. Tina har tatt nivået frå fyrste kast, og er toneangjevande for Tysklands beste handballag. Neste sesong skal ho spela for hardtsatsande Storhamar.

Glenn André Opland:

Kommuneoverlege Glenn André Opland har stått fjellstøtt i koronastormen sidan mars 2020. Og sjølv om vi no skal kåra «Årets Namn 2021», byr koronastormen framleis på kraftige vindkast. Sjølv om Opland sikkert er temmeleg lei heile greia, står han framleis like støtt. Han har sidan dag éin handtert situasjonen på ein roleg, sakleg og seriøs måte.

Merethe Offerdal Tveit:

Filmskaparen har utmerka seg med fleire lokale prosjekt over tid, og kom også i fjor ut med den prisløna dokumentarfilmen «Odelsgut og Fantefølge». Ein film som førte til at Merethe vart nominert til Amanda-prisen for beste dokumentarfilm i 2021.

Hans Inge Myrvold:

Myrvold var ordførar i Kvinnherad frå 2019 til hausten 2021. Etter at Senterpartiet kom inn i regjering, fekk han fast plass på Stortinget. Dermed vart han den fyrste politikaren busett i Kvinnherad med eit slikt verv på fleire tiår. Hatlestrendingen er også valt til helsepolitisk talsperson for Sp, og er stadig å høyra i ulike debattar.

Kim Røssland:

Kim Røssland er heilt sentral i industrieventyret Herde Kompositt, som for nokre månader sidan overtok anlegget til Palfinger i Ølve, nesten på dagen 50 år etter at Harding starta med livbåtproduksjon der. Røssland, som opphavleg er frå Husnes, men no bur på Hatlestrand, er dessutan trenar for Strand-Ulv sine NM-vinnarar i volleyball i klassen U16 for jenter.

Bjørn Heimvik:

Primus motor for dugnadsgjengen Turstiar Sunde. Eit frivillig lag som har lagt ned enormt med dugnadstimar for å få kvinnheringane ut på tur i skogane på Sunde og omland. Har i løpet av året blitt utfordra på motivasjonen gjennom gjentekne hærverk på turstien til Kaldestadåsen, utan å lete seg knekka. Turstiar Sunde er også tildelt årets frivilligpris i Kvinnherad.

Otto Blokhus og Roald Teigen:

Blokhus og Teigen står i spissen for Seniorsenteret på Husnes. Bygget er allereie i ferd med å reisa seg, og leilegheitene har blitt svært etterspurde. Her kan eldre innbyggjarar få eit godt og tilrettelagt butilbod, tett ved sentrum. Seniorsenteret er eit konsept som andre bygder kan misunna Husnes, og andre kommunar misunna Kvinnherad.

Anders Kjærevik:

Den lettbeinte varaldsøyningen sluttar aldri å imponera. Han har levert vanvitige resultat på høgt internasjonalt nivå i løp som er både lange og bratte. Merittlista vert lenger og lenger for kvart løp han deltek i. I løpet av året har han sletta løyperekordar, sprunge inn til bronse på Tenerife, og teke sølv i «Skyrunning European Championship» i Portugal.

Terje Bakke:

Treffsikker kar som gjennom strålande prestasjonar med pil og boge har gjort sitt for å fylla premieskapet til Kvinnherad Bogeskyttarklubb. Er fast inventar på Norge sitt bogeskyttarlandslag, og skaut seg i september heilt til topps i Europameisterskapen i 3D-skyting i slovenske Maribor. Dermed vart uskedelingen noko så sjeldsynt som ein EM-vinnar frå Kvinnherad.

Vaksineteamet:

For å gje kvinnheringane vaksine mot Covid-19, har svært mange personar vore i aksjon. Dette gjeld ein god del av dei fast tilsette i helsevesenet, men òg mange pensjonistar har valt å nytta tida si til beste for innbyggjarane. Vaksineteamet har stått på dag ut og dag inn, ofte med lange køar utanfor dørene, men vaksineringa har gått veldig smertefritt i Kvinnherad takka vera denne gjengen.