Arrangerer vardebrenning på Sjethaug
Aksjonsgruppa i Nei til vindmøller i Kvinnherad inviterer til vardebrenning mot vindmøller på Sjethaug i Rosendal 8. oktober.
Torsdag 8. oktober vert det nasjonal vardebrenning frå Agder i sør til Finnmark i nord for å visa motstand mot vindkraftutbygging i Norge. Det skjer også i Kvinnherad.
Artikkelen held fram under annonsen.
– Å brenna varde er noko vi har gjort i Norge sidan 1300-talet for å varsla fare. Det vil vi også gjera denne dagen. Det kjem til å bli eit sterkt og minnerikt arrangement med appellar og underhaldning, seier Annemor Ekeland i aksjongruppa Nei til vindmøller i Kvinnherad.
Det blir ein kombinert motstandsdag og familiedag på Sjethaug denne oktoberkvelden. Aksjonskomiteen ynskjer at så mange som mogleg skal ta turen.
– Det blir eit ope arrangement og vi håpar at folk tek turen. Men dei som kjem må ta på seg gode sko, varme klede og utstyra seg med lommelykt. Det kan nemleg bli mørkt før vi går ned igjen, seier Annemor.
At aksjonsgruppa landa på Sjethaug var ikkje tilfeldig.
– Vi ville brenna ein varde på ein plass kor det lyste godt. Og sjølv om Sjethaug berre er 251 meter over havet, så blir det sagt at ein kan sjå det like frå Omvikdalen, sluttar Annemor.