Åtte testa for koronavirus i Kvinnherad

I Kvinnherad er det åtte personar som har blitt testa for koronaviruset så langt, ingen av dei var smitta.

– Status er at det ikkje er noko dramatikk her lokalt. Åtte personar har blitt testa, ingen av dei prøvane var positive, seier kommuneoverlege Glenn André Opland.

Vidare fortel han at kommunen er i jamlege møter og får løypande oppdateringar på situasjonen frå Folkehelseinstituttet.

– Vi er førebudd på det meste og har alt av utstyr tilgjengeleg. Elles så er det viktig å gjera dei førebyggande tiltaka ein kan. Det gjeld handvask, hostehygiene og elles desse vanlege tinga. Regelrett intensivert folkeskikk, seier Opland.

Har du vore i område med vedvarande spreiing av koronavirus utan å ha vore i nærkontakt med sjuke, skal du følgja med på teikn til luftvegsinfeksjon i 14 dagar, men du treng ikkje å vera i karantene. Skulle du få symptom, bed kommunen deg om å ta kontakt med helsevesenet per telefon.

 

Smitteførebygging

Det skriv kommunen på sine heimesider. Her kjem dei også med fire tips til smitteførebygging.

- Vask hendene ofte og grundig med såpe og lunka vatn, særskild når du har vore ute blant folk. Handdesinfeksjon er eit godt alternativ dersom handvask ikkje er mogleg. Dersom hendene er synleg skitne eller våte har handdesinfeksjon redusert effekt, og hendene bør reingjerast med såpe og vatn.

- Det vert anbefalt å ha tørkepapir tilgjengeleg til bruk når du hostar og nys. Har du ikkje det er olbogekroken eit godt alternativ.

- Unngår å hosta eller nysa direkte på andre, og, når det er mogleg, hald minst ein meter avstand til personar med luftvegssymptom.

- Koronaviruset smittar som ved forkjøling og influensa ved at virus overførast frå luftvegane hos ein sjuk person. Dei fleste som bli smitta vil truleg får luftvegssymptom som vil gå over av seg sjølv, mens nokon kan utvikla alvorlegare sjukdomar med blant anna lungebetennelse.