Avlyser munnleg eksamen på vidaregåande
Regjeringa har bestemt at alle munnlege og praktiske eksamenar i den vidaregåande skulen blir avlyst våren 2020.
– Vi skulle sjølvsagt aller helst gjennomført eksamen som vanleg, men fylka har vore tydelege på at vi må prioritera. Derfor prioriterer vi å gjennomføra privatisteksamenar. Det viktigaste for elevane i vidaregåande er at dei får ei grundig standpunktvurdering og vitnemål, seier kunnskaps- og integreringsminister Guri Melby (V) i ei pressemelding.
Artikkelen held fram under annonsen.
Frå før har regjeringa bestemt at alle skriftlege eksamenar, både på ungdomsskule og i vidaregåande, er avlyst. No avlyser dei også alle ikkje-skriftlege eleveksamenar på vidaregåande.
– Eg veit at mange elevar har vore usikre på korleis det blir med eksamen i år. For å gi både dei og lærarane tid til det viktigaste, meiner eg det er ein rett prioritering å avlysa alle eleveksamenane på vidaregåande. Eg vil oppmoda til å utnytta tida godt heilt fram til sommarferien, slik at elevane får tid til å ta igjen det dei har mista i vår, seier Melby.
Elevane får då vitnemål med standpunktkarakterar, kjem det fram i pressemeldinga.