Avsluttar søket etter amerikanaren

Politiet i Kvinnherad har etter ein fagleg diskusjon konkludert med at dei avsluttar søket etter den sakna Marvin Lee Judy jr.

– Utifrå faglege vurderingar har vi kome fram til ein samla konklusjon om at det mest hensiktsmessige er at vi no avsluttar søket, seier fungerande lensmann Sigurd Børve ved Kvinnherad lensmannsdistrikt.

Han har denne veka møtt 57-åringen sine næraste pårørande som har vore på besøk i Rosendal.

– Vi hadde to møter der vi har gått gjennom saka og diskutert dei tiltaka vi har gjort til no. Utifrå det kjem vi ikkje til å gjera noko meir på noverande tidspunkt, seier Børve.

Politiet hadde planar om eit søk på sjøen i samarbeid med Kystvakta og Forsvaret, men har funne ut at det ikkje vert noko av i denne omgang. Men Børve er klar på at saka kan bli teken opp att.

– Vi har lagt ned store resursar i denne saka, faktisk har vi brukt maksrammene i forhold til søk etter omkomne. Men skulle vi få inn ny informasjon, vil vi sjølvsagt ta saka opp att. I tillegg vil vi be folk som ferdast mykje på sjøen om å halda auga opne, seier lensmannen.

Politiet kan ikkje garantera at 57-åringen, som har vore sporlaus forsvunnen etter at han sjekka ut frå Rosendal Fjordhotell 26. august, ikkje ligg i terrenget i Rosendals-fjella. Men ser heller ikkje vekk i frå hypotesen om at han kan ha ramla i elva.

– Og såleis drive vidare ut i sjøen. Og ein person som dett i sjøen kan både søkka ned til botn og flyta i havoverflata over tid. Så vi håpar at folk som er godt kjente langs fjorden kan koma med tilbakemeldingar til stadar der det kan vera aktuelt at han kan eventuelt ha flyte i land, sluttar Børve.