Bad om møte med næringslivet
Øyvind Hardeland (Ap) meiner det er behov for eit dialogmøte mellom kommunen, politikarane og næringslivet. Ordføraren er samd.
I kommunestyremøtet torsdag fremja Hardeland eit ynske om at ordføraren skal syta for at det vert arrangert eit dialogmøte mellom kommunen og næringslivet/entreprenørane i Kvinnherad, der også politikarane i formannskapet og forvaltningsutvalet deltek. Han fekk umiddelbar respons frå ordførar Hans Inge Myrvold (Sp).
– Eg er veldig glad for initiativet, og kjem til å følgja dette opp. Eg opplever at dette er viktig å få gjennomført i løpet av hausten, svarte han.
Artikkelen held fram under annonsen.
– Det hastar litt med dialogen med næringslivet. Det er mykje lettare å unngå mistydingar viss ein møtest «face to face», følgde Øyvind Hardeland opp.
Myrvold understreka då at kommunen generelt har ein veldig høg dialogfaktor med næringslivet; både nyetablerarar og eksisterande bedrifter.
– Så ein må ikkje tru at det ikkje finst dialog med næringslivet, avslutta ordføraren.