Bjørkedalsdammen: Ei sak for kommunen

NVE har vurdert ei eventuell nedlegging av Bjørkedalsdammen på Valen som ikkje konsesjonspliktig, noko som betyr at kommunen skal handsama denne saka sjølv.

Kommunen har to ulike roller i saka, i og med at ein no skal handsama saka etter plan- og bygningslova, samstundes som Kvinnherad kommune er eigaren av Bjørkedalsdammen.

– Om det kjem ein søknad om riving veit vi ikkje, men ein skal i alle fall gå i gang med å sjekka sjansane for å ta vare på dammen kontra å riva han. Vi har godt kompetente folk i kommunen som skal jobba med saka, seier seksjonsleiar i kommunen Anbjørn Høivik.

Sektor for teknikk og miljø skal greia ut dei økonomiske skilnadane på å riva eller å oppgradera dammen. Det har som kjent vore ein del motstand mot riving av dammen, og i samband med det konkluderte formannskapet på at ein skulle sjekka sjansane for å ta vare på dammen kontra å riva han.

– Eg reknar med formannskapet vil bli kopla på igjen, når det økonomiske er utgreidd. Før det blir det ikkje søkt om tiltak, seier Høivik.