Bjørnevik er ny Høgre-leiar
Vegard Bjørnevik (28) tek over som leiar i Kvinnherad Høgre etter Erling Niclasen.
Kvinnherad Høgre gjennomførte søndag eit digitalt årsmøte på Teams. Her vart Vegard Bjørnevik vald fram til ny leiar i lokallaget.
Artikkelen held fram under annonsen.
– Det var veldig stas. Og ikkje minst ei stor tillitserklæring frå det som er kommunen sitt største parti. Dette var ikkje noko eg bad om, men eg takka ja då valkomiteen spurte om eg hadde lyst, seier Bjørnevik til Grenda.
28-åringen frå Høylandsbygd er ganske fersk i politikken, men har vore ein aktiv skikkelse i Kvinnherad Høgre sidan kommunevalet i 2019.
– Eg har vore eit ineffektiv partimedlem i fleire år, og har vore aktiv i partiet dei siste to åra. Så eg set pris på tilliten. Heldigvis har vi eit godt styre og mange flinke medlemer i partiet, så eg trur og håper at vi skal jobba godt i lag i tida som kjem. Eg gler meg til arbeidet, seier Bjørnevik.
På årsmøtet vart Ingrid Koløy Eide vald til nestleiar, medan Stig Rusten, Arne Bjørnevik, Sølvi Ulvenes, Oddbjørn Kroka og Kjetil Helvik er styremedlem. Liv Signe Bleie Uvestadbakken og Kari Bruntveit er varamedlem.