Bli med å lage julebok!

Rosendal Bokhandel har i desse dagar eit kjekt engasjement på gong. Gjennom heile november er nemleg bokhandelen i Skålagato med på å samle inn julehistoriar frå sine små kundar.

Historiene blir samla i ei stor og fin digital julebok, som alle bidragsytarane vil få tilsendt på e-post.

– 1. november set vi i gang med å samle inn julehistorier teikna og skrive av våre små kundar! For dei som ikkje har lært å skrive enno, eller synest det blir for vanskeleg å skrive, er berre ei teikning heilt greitt, melder Rosendal bokhandel.

Det er bokhandlarar frå samanslutninga Fri Bokhandel som er saman om dette koselege førjulsprosjektet, og historiene og teikningane vil såleis kome frå born over heile landet.

– Vi gler oss og håpar på mange bidrag! Dei må leverast til oss på bokhandelen innan 25. november, og arka må vera heile, fine og ikkje bretta, står det å lesa.

Den digitale juleboka blir lagt ut på Facebook i byrjinga av desember, i tillegg til at den blir sendt til alle som leverer inn bidrag.