Bli med inn i kulissane til UKM

Årets UKM gjekk føre seg i Husnes kulturhus på fredag. Mønstringa vart likevel ikkje gjennomført som normalt, og grunna smittevern vart hendinga filma, og haldt utan publikum i salen.

Grenda var med i kulissane då den digitale versjonen av UKM Kvinnherad vart produsert. Programmet vil sleppast på UKM sine plattformer og på Kvinnherad kommune sine sider når det er klart, og ein kan allereie byrja å gle seg til denne.

Det var sju innslag som vart filma i løpet av ein lang arbeidsdag for deltakarane, og på programmet stod dans, marimba, rockeband, korps og biletkunst. I tillegg til deltakarane som bidrog med sceneopptredenar, var det også ein flott gjeng som deltok som arrangørar, samt ein programleiar.

Godt arbeid i kulissane

April Opsanger (14) og Angelica Andersen (14) frå Husnes var med som arrangørar, noko dei tykte var veldig kjekt.

– Vi har laga vafler, gjort scenearbeid med å rigge til mellom dei ulike innslaga, vi har pynta, og tatt i mot og registrert alle deltakarane som har kome inn, fortel Angelica.

April legg til at arrangørane har sett til at alt har gått greit føre seg.

– Vi har vore her sidan halv tre i dag, men det har eigentleg gått ganske fort. Eg synes det har vore kjekt, held ho fram.

Begge jentene har fått smaken på rolla som arrangør, og har allereie lyst å melda seg på til neste års UKM, som dei håpar blir gjennomført på den vanlege måten - med publikum.

Programleiar Bea

Den som hadde i oppgåve å innleie alle innslaga var Bea Røssland-Telset (13) frå Husnes. Ho strålte i rolla som programleiar, sjølv om ho ikkje hadde hatt særleg god tid til å førebu seg.

Karianne Solheim, som legg til rette for UKM i lag med Jarand Skarveland, hadde nemleg spurt Bea om ho ville vera med som programleiar to dagar før.

– Eg ringte til ho på onsdag, for eg visste kor talentfull ho er, og at ho ville våga, skryt Solheim.

Dei to har tidlegare samarbeidd i satsinga Modige talent, og Bea tok oppgåva på strak arm.

– Eg synest det har gått fint, og det har vore veldig kjekt. Mi oppgåve har vore å presentera alle som skulle opptre, fortel ho etter at opningsscena er spelt inn i flombelysning på kinosalscena.

Digitalversjon av UKM

Dette var det siste som vart filma av Roy Vaulen, som også skal setje saman programmet til filmen som vil bli presentert for kommunen sine innbyggjarar så snart den er klar.

Det er uvisst korleis resten av mønstringa vil halda fram. Vanlegvis går utvalte innslag vidare til ei fylkesmønstring, der nokre frå regionen vert valt ut til å delta på ei nasjonal mønstring. I år er den nasjonale mønstringa avlyst, og det er uvisst om Kvinnherad sender nokre av innslaga til fylkesmønstringa, som også den vil vera digital denne gongen.

– Målet vårt er å få vist innbyggjarane i Kvinnherad at kulturlivet i kommunen er veldig bra! Det er også viktig for oss å tilby dei unge ei scene der dei kan ha det fint og utvikla seg kreativt, avsluttar Solheim, som meiner at verdien av å leggja til rette for slike arrangement for born og unge er viktigare enn nokon gong.