«Bør andre innsparingspotensiale undersøkjast?»

Nok ein gong skal skulestrukturen i kommunen opp til debatt.  Denne gongen går dei svært langt, og det er to særs drastiske framlegg som vert lagt fram som alternativ til eksisterande struktur.  Denne gongen er det også framlegg om færre og større barnehagar.

Skulestruktursaka har vore stadig tilbakevendande, og har skapt mykje uro i bygdene.  Hovudgrunnen til dette er at nokre meiner at det er så mykje å spara i kroner og øre. I tillegg pakkar dei det inn i svært så diskutable argument når det gjeld kvalitet, og har til og med laga ein provoserande teiknefilm. Denne er rett og slett eit makkverk.  Eg kan ikkje skjøna anna enn at den er laga av personar som null kjennskap til det indre liv som rører seg i Kvinnheradsskulane  der tilsette verkeleg står på for å gje borna eit best mogeleg tilbod.  Fleirtalet av desse har også særdeles gode næraktivitetsanlegg og natur rundt seg som vert flittig brukt. Ofte har uteområda blitt til ved ein betydeleg dugnadsinnsats av tilsette og foreldre. Bygdeskulane skaper nemleg engasjement, dugnadsånd og eit eigarforhold til skulen.  I propagandafilmen vert dette vist som «skur til nedfalls»!

Det er ikkje noko grunnlag for å leggja ned velfungerande skular som Omvikedalen, Uskedalen, Sunde med fleire ut frå pedagogiske og sosiale kvalitetskriteria.  Eg har lagt merke til at folk som ikkje jobbar med elevar i skulen, vektlegg dei nasjonale prøvane sterkt når dei skal vurdera kvaliteten på skulane.  Skulefolk veit at dei fortel svært lite om utviklinga til elevane. Den er meir samansett enn at det enkelt kan målast! Dessutan veit vi at dei blir avvikla svært ulikt frå skule til skule trass i at det er klare retningslinjer for gjennomføring. Medan nokre skular drillar elevane i akkurat den prøveforma på førehand, gjer andre det ikkje.

Skulen og barnehagen er sentral i ei bygd, og er svært viktig når unge skal busetja seg.  Arbeid, tilgang tomtar og bustader er andre viktige element.  Frå stova mi, her i Uskedalen, ser eg opp på aktiviteten i Ospelunden byggefelt. Det har skapt optimisme i ei bygd som lenge har hatt knapt med byggjeland. Siste åra har det vakse opp stadig nye bueiningar, og i mange av dei er det unge folk.  Utover i året vil det bli stor aktivitet, og det må vi håpa held fram.  Fruktene av dette vil vi hausta i åra framover. Berre sidan nyttår veit eg at det er flytta heim to familiar(heimflyttarar/tilflyttarar) med 4 born under skulealder der.  Det er slikt vi ønskjer for å skapa levande bygder. Nærleik til skule og barnehage er viktig for at slike gledelege ting skal skje!

Ved å leggja ned gode og mellomstore skular og barnehagar er eg redd for at desse levande bygdene som skorar høgt på både trivsel, næraktivitetar, dugnadsånd og god bygdekultur, kan visna vekk. Dei misser hjarta sitt. I mange av desse bygdene er det eit særs godt og variert aktivitetstilbod til born og unge takka vere ein kjempeinnsats frå frivillige.  Kva må desse føla etter at denne innsatsen blir framstilt på ein svær simpel måte i nemnde teiknefilm!

Eg trur politikarar og administrasjon må få utgreidd andre område for mogelege innsparingar. Det er ei kjend sak at Kvinnherad kommune har svært mange leiarar.  Dei seinare åra har det vore sterkt aukande, og kommuneadministrasjonen har blitt meir og meir topptung. Her trur eg det kan vera eit stort innsparingspotensiale.  Det er på høg tid at dette vert teke på alvor og blir utgreidd. Eg er spent på den animasjonsfilmen(propagandafilmen)!

 

Av Thor Inge Døssland, Uskedalen 12.02.21

 

[gravityform id="11" title="true" description="true"]