BUA held sommarope

BUA får stadig inn nytt aktivitetsutstyr på Husnes. Utstyr dei ynskjer skal koma alle innbyggjarane i kommunen til gode.

– Vi har hatt ein god start, og det er tydeleg at det er populært. Men vi ynskjer at fleire skal ta det i bruk, for dette er for folk i heile kommunen. Difor har vi òg fått på plass ein hengar slik at alt kan transporterast rundt om kring, seier Veronica T. Thorsen.

Det er no godt over ein månad sidan BUA offisielt opna på Husnes. Sidan då har dei jobba med å få på plass frivillige til sine faste opningstider. Det var også ei stund tvil om kor mykje dei kunne ha opent i sommarferien, men no er det ordna.

– Vi har fått på plass frivillige som gjer at vi kan halda opent to dagar på dagtid i veka sommaren gjennom. Så det er fantastisk. Det kjem då i tillegg til opningstidene på ettermiddagane, seier Veronica.

 

Tilbod for alle

Nokon av BUA sine frivillige var måndag i full sving med å pumpa opp padlebrett og få registrert det nyaste utstyret i datasystemet. Men sjølv om dei no har grei dekning ut sommaren, blir dei veldig glade om fleire ynskjer å bli med.

– Vi har alltid bruk for frivillige, så om det er nokon som har lyst til å bidra så er det berre til å ta kontakt med meg, seier Veronica.

Men det viktigaste no er å få fram at dette er eit tilbod for heile kommunen.

– Vårt mål er at utstyret skal vera i bruk, det kjedelegaste er om det er innelåst her inne. Og det er eit tilbod for heile kommunen. Vi har hengar for å få transportert ting rundt, så det er mogleg for alle å ta i bruk det utstyret vi har, seier Veronica.

Om du lurer på kva utstyr dei har så er alt registrert på heimesida deira BUA.io.