Bustadhus nedbrent

Like før 11.30 onsdag rykte politiet ut til ei privat adresse på Sunde etter at det blei meldt om røyk og mogleg brann på staden. 

Ein dryg halvtime seinare fortalde politiet at det var full overtenning i eit bustadhus, og at det var fare for spreiing av brannen til andre hus.

– Det pågår evakuering av nabohus. Det er ein person som er skadd og som blir ivaretatt av helse, meldte operasjonsleiar i Vest politidistrikt, Knut Dahl-Michelsen.

Saka held fram under videoen:

Den skadde personen skal ha fått brannskadar.

Høge smell

– Brannvesen er på staden og har starta utvendig sløkking, meldte Tore Fanebust i 110-vest. Brannpersonell frå Husnes, samt Uskedalen og Halsnøy rykte ut. 

Det brann også i terrenget rundt bustaden. 

– Det er høyrt nokre smell frå innsida av bustaden som brenn, ukjent kva dette var, mogleg gassbeholdar, opplyste Dahl-Michelsen.

Nedbrent

Klokka 12.49 skreiv politiet at sløkkinsarbeidet framleis pågjekk. 

– Det er cirka 10 hus i området som er straumlause som følgje av brannen. Brannen har ikkje spreidd seg til andre hus, men det kan ha oppstått vasskadar på nærliggjande hus som følgje av sløkkingsarbeidet. 

Klokka 12.52 opplyste innsatsleiar hos brann at dei då hadde kontroll, og at dei dreiv med ettersløkking på staden. Huset er nedbrent.