Byggjefelt i Ølve kan bli delt i tre

For å få realisert eit byggjefelt i Ølve, vurderer kommunen å kjøpa heile området av O. Jacobsen trelast AS. Etter full utbygging av infrastruktur, skal deler av feltet seljast attende.

Som Grenda skreiv i midten av juni, har O. Jacobsen trelast AS på Hatlestrand kontakta kommunen med førespurnad om hjelp til å få realisert byggjefeltet ved Dalsjøen. I siste formannskapsmøte før ferien, fekk rådmann Odd Ivar Øvregård klarsignal til å gå i forhandlingar med firmaet.

Torsdag kveld fortalde han politikarane om status for desse forhandlingane. Samstundes ynskte han føringar for prosessen vidare.

– For å setja i gang med å byggja må dei ha infrastrukturen på plass, og det er kostnadskrevjande. Dei har kjøparar til ein del av tomtene, men på langt nær til alle, sa Øvregård.

 

Den opne marknaden

Etter å ha analysert korleis kommunen kan engasjera seg på ein lovleg og rettferdig måte, har partane konkludert at den einaste akseptable modellen er å dela feltet i tre deler.

– Prosedyren blir då at kommunen kjøper heile byggjefeltet, for same sum som det i si tid vart seld for, berre justert for prisstigninga. Så byggjer kommunen infrastruktur i heile feltet. Deretter er O. Jacobsen forplikta til å kjøpa tilbake éin tredel med ein gong, samt at dei har opsjon på éin tredel til i nokre år. Såleis har dei kontroll på to tredeler av feltet. Den siste tredelen kan kommunen selja fritt på den opne marknaden, eller byggja der sjølv. Dermed sikrar vi at alle får tilgang til området, opplyste Øvregård.

Rådmannen vedgjekk at han ikkje er sikker på konsekvensane av denne metoden, og at det kan vera økonomisk risiko knytt til prosjektet.

 

Kvinnherad-modellen

Bernth-Harry Eliassen (Ap) syntest det var vanskeleg å seia noko konkret på grunnlag av ei munnleg framstilling, og ynskte difor ei skriftleg saksutgreiing.

– Det høyrest akseptabelt ut, men eg kan ikkje seia ja eller nei i dag, kommenterte han.

– Tanken er god, men saka kan skapa presedens. Enten må kommunen driva med dette heilt på eiga hand, eller så må det ut på den opne marknaden, var Kai Morten Torget (Frp) si meining.

Høgre-representantane Leif Sverre Enes og Sølvi Ulvenes tykte det var spennande tankar rådmannen kom med, og understreka behovet for byggjeland i Ølve.

– Dette kan bli Kvinnherad-modellen når det gjeld partnarskap mellom private og kommunar. Det er heilt rett å satsa på bustadbygging i Ølve, sa Enes, og viste til at store bedrifter som Ølve industrier og Palfinger held til i bygda.

Rådmannen tolka det dit at signala var positive, og vil difor prøva å forhandla fram ein endeleg avtale.

– Og så legg eg den fram til politisk behandling, for dette er ei veldig prinsipiell sak, slo han fast.