Bytta klasserommet ut med Steinparken

5. klasse ved Undarheim skule tok onsdag skuledagen utandørs. Blant anna var dei på steinjakt i Steinparken.

– Det der er nummer 21, så vi nærme oss. Vi prøver nemleg å finna nummer 29 og ta eit bilete av den. Nummer 29 på denne lista er Norge sin nasjonalstein, seier Amalie Markhus og peikar i heftet ho har fått utdelt.

Ho og hennar klassekameratar frå 5. klasse ved Undarheim var nemleg på besøk i Steinparken onsdag.

– Denne dagen er ein del av den kulturelle skulesekken og handlar i stor grad om at elevane skal bli betre kjent i nærområdet sitt, seier lærar Eirik Werner Eikeland før kollega Norolf Tvedten skyt inn:

– Vi startar dagen her i Steinparken før vi vidare skal på besøk i Folgefonnsenteret. Så blir det buss tilbake til skulen på slutten av dagen.

Ut av klasserommet

I strålande solskin vandra elevane rundt om i Steinparken i mindre grupper på jakt etter forskjellege steinartar. Men det var ikkje sjølve leitinga som var kjekkast.

– Det kjekkaste er at vi får koma oss ut av klasserommet. Eg har med meg ein fotball i sekken, men det ser ikkje ut som vi får spelt noko fotball dessverre, det er ikkje så lett her i alle fall. Så enn så lenge får ballen ligga der den ligg, smiler Olav Bernhard Vågen Heggøy.

Det å få koma seg ut av klasserommet var det fleire som var glade for.

– Det er kjekt, og så er det kult med desse forskjellege steinane, Tobias Fredheim Sunde før Amalie Markhus skyt inn:

– Så får vi lov å bruka mobiltelefonane våre, sånn at vi kan ta bilete av det vi ser. Det får vi ikkje til vanleg, smiler ho.