Vidar Ask er ein aktiv pensjonist. Han meiner dei eldre i kommunen er ein ressurs som kan nyttast endå meir.

– Dei eldre er ei veldig ressurssterk gruppe

Vidar Ask har vore engasjert i lag og organisasjonar heile livet. Eit lite stykke opp i pensjoniståra har ikkje dette endra seg, kanskje heller tvert imot.

Som det elles går fram av Frivilligavisa til Grenda, har Hatlestrand, Ølve og Varaldsøy fleire tilbod som ikkje finst andre stader i kommunen. Men unnatak av Søral-pensjonistane på Husnes, er desse tre bygdene også dei einaste med eit aktivt pensjonistlag.

– Tidlegare kalla vi oss HVØ Pensjonistlag, men no har vi skifta namn til Pensjonistforbundet HVØ. Dette etter pålegg frå sentralt hald om at Pensjonistforbundet skulle vera med i namnet, fortel Vidar Ask.

Artikkelen held fram under annonsen.

Han sit i styret saman med leiar Rita Martens Meyer, Johannes Femsteinevik, Svein og Marit Berge, Arnhild Løkken Berge og Torgils Våge. Frå tidlegare kan Vidar skilta med styreplass i det lokale turlaget, lange periodar i idrettslaget, to periodar i soknerådet, leiar i bygdelaget og mangeårig leiar ungdomslaget.

– Det har alltid vore eit eller anna, og av ein eller annan grunn vert eg ofte valt til leiar. Kanskje fordi ingen andre vil? Men det viser seg at det er lett å vera leiar viss du har eit godt styre, smiler han, medan nybaka eplekake, potetkaker og kaffi kjem på bordet.

Hæla i taket

For tida er han også leiar i kommunen sitt eldreråd. Men denne praten skal handla om Pensjonistforbundet HVØ. Det er ein svært oppegåande gjeng, som har medlemsmøte på Hatlestrand skule éin gong kvar månad. Då er det rundt 70 personar som møter opp.

– Vi har alltid eit godt og interessant program. Førre gong var gruppa «Flo sjø» frå Bømlo med. Dei trekkjer mykje folk, og er veldig gode musikarar, fortel Vidar Ask.

Torsdag 27. oktober markerer dei FN sin internasjonale eldredag med fest i Ungdomshuset i Ølve. På programmet står musikk med Kvam trekkspelklubb, mat og kåseri.

– Då blir det sikkert 100 som kjem. Alle svingar seg, og det er hæla i taket frå seks til ti om kvelden, lokkar Vidar.

Som om ikkje det er nok, skal gjengen til Bergen 3. november for å sjå framsyninga «En natt forbi» med Jan Eggum.

– Vi har éin eller to revyturar til Bergen kvart år. Då bestiller eg buss til 50 personar, og det er alltid fullt. I tillegg skipar vi til vårtur og ein to-dagars hausttur, opplyser Vidar.

Artikkelen held fram under annonsen.

Vidar Ask bur i praktfulle omgjevnader på Hatlestrand.

Like spreke

Pensjonistforbundet HVØ ordnar også med praktisk arbeid som fleire får glede av. Det siste store prosjektet var oppussing av golvet i den gamle gymsalen for 100.000 kroner. I alt har dei investert for nærare 300.000 i den salen.

Medlemmene deira er ikkje berre frå Hatlestrand, Ølve og Varaldsøy. Også folk frå andre sida av fjorden og Tysnes stiller opp.

– Men vi slit litt med å få tak i yngre pensjonistar. Dei føler seg ikkje gamle nok til å verta med, analyserer 74-åringen, som i yrkeslivet var rektor på Norheimsund vidaregåande skule.

Karen frå Ask på Hatlestrand meiner bestemt at kommunen, lag og organisasjonar kan nyttiggjera seg meir av pensjonistane.

– Dei eldre er ei veldig ressurssterk gruppe, som kan gjera mykje av seg om ein klarar å setja det i system. I Kvinnherad bur det om lag 3.200 personar over 65 år. 80% av dei er oppegåande friske. Det ytre forfell, men inni er vi like spreke. Det er ein enorm helsegevinst i å få folk til å vera aktive. Då vil også kommunen spara mykje på helsetenestene, seier Vidar Ask.