Den store refleksdagen

18. oktober er den store refleksdagen. Trygg trafikk oppmodar alle til å bruka fem minutt ekstra på å ta på seg refleks. Det kan spara mange liv.

I følgje ein undersøking utført av TNS Kantar på oppdrag for Trygg Trafikk og SpareBank1 hausten 2017, har 1,7 millionar nordmenn opplevd ei nestenulykke på grunn av manglande refleksbruk. Det vil Trygg Trafikk redusera med å gjera folk bevisste på kor viktig det er med refleks. Ingrid Lea Mæland frå Trygg Trafikk Rogaland kan fortelja at det har ein effekt.

– Me kan sjå at kampanjane har hatt ein effekt. Det har vore ein svak auke i mengd person som brukar refleks, frå om lag 25 til 30 %. Det at folk blir medvitne om det og i tillegg får ein refleks i handa, gjer at det blir lettare å bruka, seier Mæland.

 

Menn over 40

Men dei er ikkje heilt nøgd enno.

– At ein av fire brukar refleks er ikkje godt nok. Forsking viser at mengd skadde og drepne blir veldig redusert ved bruk av refleks, så det ingen tvil om at det verkar, seier Mæland.

Mange tenkjer at sjåførane ser meir og lenger enn dei faktisk gjer.

– Ofte tenkjer ikkje folk på at det er ei viss reaksjonstid frå sjåføren oppdagar deg til vedkomande klarar å bremsa opp. Tida blir og lenger visst sjåføren er trøtt, uoppmerksam eller blir påverka av andre ytre faktorar som regn, andre lys eller skin i asfalten. Då er det ekstra viktig at dei kan sjå deg på lang avstand. Her kan refleksen faktisk vera ein livreddar, seier Mæland.

Generelt har Trygg Trafikk erfart at ungar er mykje flinkare enn vaksne til å bruka refleks. I følgje statistikken er det menn over 40 som er blant verstingane når det kjem til refleksbruk.

– Vaksne er ofte flinkare å passa på ungane sine enn seg sjølv. Dei tenkjer ofte at dei klarar dette mykje betre, men det har me erfart at dei ikkje alltid gjer. Ungane er i tillegg mykje flinkare enn oss til å gjera det som dei får beskjed om er sikkert og trygt. Dei ser risikoen i trafikken og vel ofte det sikraste alternativet, seier Mæland.

Det finns mange alternativ når det kjem til refleks, men den beste er den som dinglar.

– Forsking har vist at dei gode gamle refleksane i hardplast, som beveger seg og heng i knehøgd har best verknad. Refleksband rundt føtene er òg effektivt. Dette er fordi sjåførane reagerer betre på noko som beveger seg i gangmønster. Men refleksvesten er òg veldig god fordi neonfargen på sjølve vesten kan væra med å bidra, spesielt i skumring eller gatelys, seier Mæland.

 

Ansvar

Brukar ein berre lommelykt, er ikkje dette godt nok.

For ein sjåfør, kan ofte eit lys bli oppfatta som ei gatelykt eller gjenskin. Ein kan difor risikera at sjåføren ikkje oppfattar deg som gåande, og ikkje tek omsyn til å bremsa ned, seier Mæland.

Refleksen skal likevel ikkje få det fulle ansvaret.

– Refleksen er eit godt verktøy me har til å bli oppdaga som mjuk trafikant. Likevel er det viktig at sjåførar og gåande tek ansvar sjølv òg. Spesielt no om hausten når det regnar og er mørkt, vil sikten og merksemda gå ned. Då må sjåførar væra ekstra obs og gåande bør sjå seg ekstra godt om når dei til dømes skal kryssa vegen, seier Mæland.

Heilt til slutt har Mæland ei oppfordring på vegne av Trygg Trafikk:

– Ta fram refleksane du har liggande. Lys på dei i mørke og sjå om dei har effekt. Elles gå å få tak i ny. Legg dei i jakkelomma og husk å ta dei på når de skal ut å gå. 50 kroner for ein refleks er ein billig livsforsikring. Har ein stor familie og mange ungar kan det vera lurt å ta med seg ein gratis refleks der det er mogleg. I morgon er det til dømes Refleksdagen, då er det til mogleg å få tak i gratis refleks mange stader. Og til alle dei vaksne. Viss ungane kva som er sikkert og rett, og gå føre med eit godt eksempel, avsluttar Mæland.