Dei tilsette på biblioteket stilte med ballongar og flagg då dei stolt viste fram sin nye bokbuss for aller første gong 2. september. Måndag denne veka kunne dei feira at dei er kåra til Hordalands beste bibliotek. Her ser vi sjåfør Håkon Sletten (t.v.), Hilde Gry Opheim, Trude Hege Bergesen, Susanne Fæhn, Therese Sund Langeland, Monica Nessestrand og Anita Larsen.

Denne gjengen driv Hordalands beste bibliotek

Marius Tveit Nissestad
Publisert: 22.09.2020 10:30

Kvinnherad bibliotek er kåra til Hordalands beste bibliotek for 2019.

Måndag var Norsk bibliotekforeining (NBF) avdeling Vestland samla til kurs på Knarvik. Her gjekk NBF Hordaland offisielt over til Vestland.

Artikkelen held fram under annonsen.

– Det første oppdraget til nye NBF avdeling Vestland var å dela ut prisen for årets bibliotek i Hordaland. Årets vinnar er Kvinnherad bibliotek, skriv NBF Vestland på Facebook.

 

Kakefest

Til stades på samlinga var biblioteksjef Trude Hege Bergesen.

– Det er kjempegøy. Det viser at vi har gjort mykje riktig. Dette er ein pris vi får for ting vi har gjort oppgjennom åra, men då særleg i 2019, seier Bergesen.

Ho delte gladnyhenda med sine kollegaer måndag kveld, og skal tysdag tilbake til Kvinnherad for å feira.

– Vi er eit lag som står på, og det hadde aldri gått utan alle. No skal eg køyra heim til Kvinnherad, så blir det feiring med kake, seier Trude Hege.

Kvinnherad bibliotek vart nominert etter ei avstemming av folket. Her vart dei plukka ut saman med Voss og Askøy, før ein jury krona vinnaren.

– Dette er ikkje berre ein pris for folkebiblioteka i Hordaland. Det gjeld alle bibliotek. Det er ein gjev pris som heng høgt, og vi er veldig glade for å vunne, seier biblioteksjefen.

NYHENDE