Denne sesongen skal Ripel Jensen køyra for nytt merke

Etter 18 år med Kawasaki skal Marius Ripel Jensen køyra for Yamaha den komande sesong.

– Det vert veldig spennande. Eg har jo køyrd Kawasaki i 18 år no, så eg har vore grøn lenge. Og eg skal innrømma at det på mange måtar var vanskeleg å bestemma seg for å byta merke, men eg følte at tida var inne og at det har vore ei rett avgjersle, seier Marius Ripel Jensen.

Trivst på Yamaha

Det var i fjor på denne tida at Team Ripel’n byrja å leika med tanken på å gå over til eit nytt sykkelmerke. Marius reiste difor ned til den nye banen i Sokndal for å testa eit knippe nye syklar.

– Og då følte eg meg ganske komfortabel med Yamaha-en. Vi tenkte mykje på dette her, og vart eigentleg heilt sikre etter siste NM-runde i fjor på at vi skulle byta, seier Ripel Jensen.

Laget har no inngått eit samarbeid med Yamaha Norge og Yamaha Bergen.

– Dei har hatt lyst å få meg med på laget tidlegare òg, men det har ikkje blitt noko av før no. Det er ekstra kjekt når du veit at dei har lyst å ha deg med, og det gir heilt klart ein ekstra boost, seier Ripel Jensen.

Må gjera seg kjent

Han fekk sykkelen heim i tunet så seint som klokka ni på kvelden 3. februar. Då starta også jobben med å gjera seg skikkeleg kjent med sin nye leikekamerat.

– Det er alltid kjekt og spennande med noko nytt. Men det er også utfordringar med det å bli skikkeleg kjent med sykkelen. Yamaha-en har ein motor som fungerer litt annleis. Oppsettet på sykkelen er nytt og det er ei rekkje tilpassingar som må til for å få den perfekt. Eg har venta på sykkelen sidan oktober, men fekk den ikkje før på torsdag, så no er det berre til å demontera den heilt frå kvarandre og byggja den opp slik vi vil ha den, seier Ripel Jensen.

For om Marius skal kjempa i toppen også denne sesongen, er kvar ein detalj viktig å ha på plass.

– Det er vanvitig kor små endringar som skal til for å få veldig store utslag, seier han og legg til:

– Sidan sykkelen er ny så må eg òg læra meg han å kjenna. Eg veit at motoren har mykje meir mellomdrag og er litt rolegare enn det eg har hatt tidlegare. Det handlar då mykje om at eg må læra meg å bruka turtalsregisteret rett. Men det skal bli ein kjekk jobb, og eg gler meg stort til ny sesong, seier han.

Toppen er målet

Før sesongstart 27. mai, får laget minst ei skikkeleg testgjennomkøyring. Den finn stad i Sokndal 7. og 8. mai.

– To dagar testing kan bli litt lite, spesielt med ny sykkel. Vi skulle aller helst ha vore i Spania både ein og to gonger allereie, sånn som konkurrentane har vore. Men når du ikkje har sykkel, så fungerer det dårleg å reisa ned dit for å jogga rundt banen, ler han.

Målet denne sesongen er likt som alltid. Han skal stå øvst på podiet.

– Det er klart. Vi kan ikkje setja nokon dårlegare mål denne sesongen enn vi har gjort dei føregåande åra. Målet er toppen, og denne sesongen satsar vi faktisk endå meir. Vi legg mykje i den komande sesongen og har tru på at det vil gå bra, seier han.

I tillegg til ny sykkel har også laget fått på plass ei eiga heimeside, kor dei vil oppdatera fansen om siste nytt. Samtidig som dei vil gjera det mogleg å følgja Marius sine prøvetider og direktesendingar av løp.